Agartala, Jylliew:
U State President jong ka Tripura BJP – Rajib Bhattacharjee ha kane ka taiew kaba mynta u la pyntip ba u National President jong ka seng BJP – J P Nadda un sa wan ban ai jingkren ha ka jingïalang paidbah kaba la buh ban pynlong ha ka thaiñ Santirbazar, Tripura ha ka 17 tarik mynta u bnai.
Na ka liang u Rajib u la pyntip ba ka jingwan jngoh jong u Nadda ïa ka jylla Tripura kan dei ka jingpynsdang jong ka seng BJP ïa ki kam ïalap ilekshon na ka bynta ka ilekshon Lok Sabha kaba la buh ban pynlong ha u snem u ban sa wan.
U Rajib u la pyntip shuh shuh ba ka jingïalang paidbah ha ka thaiñ Santirbazar ka dei shi bynta na ka rynsan jong ka seng BJP kaba la pynlong ha kylleng ki bynta jong ka ri India kum shi bynta ban rakhe ïa ka lyngkhuh dap 9 snem jong ka sorkar NDA.
U Rajib u la pyntip ba u JP Nadda un wan ban poi ha ka jylla Tripura ha ka 16 tarik mynta u bnai bad ha katei ka sngi un leit ban ïashim bynta ha ka jingïalang bad ki nongïalam ba rangbah jong ka seng BJP kynthup ïa u Myntri Rangbah jong ka jylla – Dr. Manik Saha. U la ïathuh ba u Nadda un leit ban ïashim bynta ha ka jingïalang paidbah ha ka 17 tarik mynta u bnai bad ha katei kajuh hi ka sngi un leit phai biang sha nongbah Delhi.
Kat kum ki jingïoh lum khubor la ïathuh ba na ka liang u Myntri Rangbah jong ka jylla – Dr. Manik Saha lem bad u Rajib Bhattacharjee ha ka Sngi U Blei ba la dep ki la pynlong ïa ka jingïalang bad ki Myntri ka sorkar jylla lem bad ki nongïalam jong ka BJP ban ïakren halor ki mat kiba ïadei bad ka jingpynkhreh ban pdiang burom ïa u JP Nadda.
Kum ban shu ïathuh hangne, ka jylla Tripura ka don ïa 2 tylli ki konstitwensi na ka bynta ka ilekshon Lok Sabha . Ki 2 tylli ki konstitwensi ki kynthup ïa ka thaiñ West Tripura bad ka thaiñ East Tripura – ki thaiñ ba long nongmihkhmat da ki MP jong ka BJP.
