Ka jingïakynad ha jylla Manipur hapdeng ki jaitbynriew ka la neh la shi bnai tam bad ka la don ka jingpynïap briew ba shyrkhei nalor ka jingkylla phetwir jong ki nongshong shnong. Ngim tip haduh lano kane ka jingïakynad kan bteng. I kumba ka sorkar jylla bad ka Sorkar Pdeng ki la dum ka buit ka stad kumno ban teh lakam ïa ka jingïakynad bad ban wanrah biang ïa ka shongsuk shongsaiñ. Ka jingjia ha Manipur ka don jingktah pat ïa ki jylla ba marjan na ka daw jong ka jingkylla phetwir ki nongshong shnong. Nalor ha jylla Assam, Mizoram, Nagaland, ki la don ruh kiba la wan poi sha Meghalaya namar ki don ki Manipuri kiba la shong la sah hangne la bun snem. Ka dei ka kamram jong ki Dorbar Shnong bad ki bor jong ka sorkar ban peitngor ïa ka rung ka mih jong ki phetwir na Manipur.
Ngim pat lah ban batai haduh katno ngut ki don ki nong Manipur kiba la wan rung sha Meghalaya naduh ka 3 tarik Jymmang, 2023 kaba long ka sngi ba la sdang ka jingïakynad ha katei ka jylla. Ki lah ban don da ki phew ne ki spah ngut. Hynrei ki ban tip bha ïa kane kin dei ki Dorbar Shnong bad ki pulit ha ki thanat. Ka dei ka kamram jong ki pulit bad bor distrik ban ïatreilang bad ki Dorbar Shnong ban peitngor ïa kiba wan na Manipur khnang ba kan ym don jingktah hadien habud. Ngi sngewthuh ba ka jingïakynad ka long kaba jur bad kam shngaiñ ïa ki nongshong shnong ka Manipur ba kin ïadon ha ki shnong ki thaw kiba don hapdeng jingma. Hynrei kam mut pat ngi hap ban pynjynsur ïa ka jingpeitngor namar ngi ruh ngin hap ban tip kiei kita kiba rung ba mih bad kiba shong ba sah. Ki don ruh kiba la pynmih khubor ba ki la don katto katne ngut ki nong Manipur kiba la wan phet sha Shillong kiba la leit pan kot pan sla na ki khlieh nongsynshar shnong khnang ba kin ïoh jingithuh kum ki nongshong shnong ka Meghalaya. Kiba kum kine ki jingleh ki long kiba ma bad ki Rangbah Shnong bad ki Dorbar kin hap ban ïa husiar bha. Ngim lah ban shu pdiang bad pynlong nong Meghalaya lut ïa katba don. Lehse katto katne por namar ka jingdon ka jingïakynad ngi lah ban ai jaka sah ïa ki katto katne. Tangba kan ym lah ban bteng shirta.
Ka long kaba lyngngoh ba haduh mynta u Myntri Rangbahduh, Narendra Modi, um pat kren eiei halor ka jingjia ha Manipur. Hooid, na ka liang u Myntri Korbar Ri, u Amit Shah, u la leit sha Manipur bad ïakynduh ïa ki kynhun bapher-bapher bad ka Sorkar Pdeng ka la thaw ruh da ka kynhun ka ban ïathir halor kumno ban wanrah biang ïa ka shongsuk shongsaiñ. Tangba ngim pat ïohi ne ïohsngew ïa u Myntri Rangbahduh ka Ri ba un kren eiei. Lehse u lah ban don la ki jong ki daw, hynrei wat haba la ïaid la shi bnai tam, u Myntri Rangbahduh u dei ban don ïa ka jingkitkhlieh kum u nongïalam jong ka Ri India baïar. U la dei ban tuklar hi noh dalade namar haduh mynta ngim ïohi ba kata ka jingsuk kan wanphai lane ngim ïohi ba kan don ka lynti ïa ka jingsuk ba kan wan biang ha Manipur. Lehse ki paidbah ka Manipur kin sngap ïa u nongïalam jong ka Ri haba u kren bad u kyntu. Hynrei ngim pat ïohi pat ba ka la don kum kata ka jingpyrshang na ka liang u Myntri Rangbahduh.
Ki pulit ka jylla ki dei ban pynkhlaiñ ïa ka jingpahara bad jingkhynra ha khappud kiba dei ki bynta ban rung sha Meghalaya. Kawei-pa-kawei ka kali kaba wan nabar ka dei ban shah khynra ban peit mano kiba wan ba leit. Lada ym lah ban teh lakam naduh na khappud, ngin ïa beh shano shuh ïa ki briew ynda ki la wan poi haduh ha ki shnong ki thaw. Ka sorkar ka dei ban pynmih da ki kyndon kumno ki pulit kin leh lada ki lap ïa ki nong Manipur kiba wan rung sha Meghalaya. Kata ka ‘Standard Operating Procedure’ (SOP) ka dei ban don khnang ba kan ym mih jingkulmar hadien habud. Ban shu ïa sngap mynthi ruh kam dei bad ban pyrkhat ba kiei kiei kin shu jah la ka jah hi ha suiñ. Kam lah ban long kumta. Lada ki bun kita kiba na Manipur, ka sorkar kan hap ban wad da ki jaka kiba i biang ban pynshong pynsah ïa ki bad ym ban ailad ba kin ïa leit shong leit sah kat shaba ki sngewbit. Ngim lah ban shu kyntait beit ïa ki briew kiba ngat ha ka lanot jong ka jingïakynad khamtam kiba lui-lui tangba ka dei ban don da ka lynti bad ka rukom pynïaid kaba biang bad pyrkhing lym kumta ki lah ban mih sa da kiwei pat ki kam ki bym sngewtynnad hadien katto katne por.
Ka jingeh ka long ba ym don ba tip haduh lano kane ka jingïakynad ha Manipur kan bteng. Ka lah ban kut noh ha kine ki sngi lane ka lah ban bteng khlem pud sngi. Namarkata, ka sorkar Meghalaya ka dei ban peitngor bha bad hap ban buh da ki kyndon kiba pyrkhing. Buh da ki babu sorkar ki ban peit beit thik tang halor kane ka bynta bad ban leit wad shaei kiba la wan phet na Manipur ki shong ki sah ha Shillong lane ha kiwei pat ki bynta jong ka jylla. Wat kheiñ sting ïa kane ka kam.
