Washington, Jylliew:
U nongrah ktien jong ka India sha United States, u Taranjit Singh Sandhu, ha ka Sngi Nyngkong u la ong ba ka jingkiew stet ha ka jingiadei hapdeng ka India bad ka United States ka long kaba khlaiñ haduh katta. Ia kane, u Sandhu u la kren ha ka por ai jingkren ha ka ‘India Ideas Summit’ ba la pynlong da ka US-India Business Council.
Shuh shuh ruh u Sandhu u la ong ba dei tang ma u, u Myntri Rangbahduh ka ri India- u Narendra Modi napdeng ki nongialam ka India u ban ioh leit iadon bynta bad ka Congress jong ka United States la arsien kynthih. Ha katei ka jingkhot sngewbha jong u President ka US- u Joe Biden bad ka First Lady Jill Biden, u Modi un ioh ban leit jurip sha United States naduh ka 21 tarik une u Jylliew haduh ka 24 tarik. Ha katei ka jingialang India-Ideas Summit, la iadon bynta lang ruh da u Secretary of State- u Antony Blinken bad u President ka USIBC- u Atul Keshap, ha kaba ki la ia ai khublei ia ka USIBC halor ka jingpynlong ia katei ka jingialang ba kyrpang ha katei ka sngi.
Haba ai jingkren ha katei ka sngi, u Taranjit Singh Sandhu u la ong ba sa tang kumba shi taiew eiei, u Myntri Rangbahduh ka ri India u la dei ban leit jurip sha United States, kumba la khot sngewbha da u President ka US. Kumta, baroh arliang ri ruh ki dap da ka jingsngew kmen ban ioh iadon bynta ha kum kitei ki kam, kum shi bynta ruh ban wanrah shuh shuh ia ka jingiadei kaba kham jan hapdeng jong kine ki arliang ri.
Shuh shuh ruh u la ong ba kane kam long tang namar ka jingtrei shitom jong ka sorkar, hynrei kane ka long namar ka jingtrei shitom jong baroh lang kiba la iadon bynta ha katei ka kam. Namar ka jingtrei shitom lang jong baroh kiba iadon ha katei ka kamra ha ka jingialang ha katei ka sngi, kiba la trei shitom ban wanrah ia ka jingiadei kaba khlaiñ hapdeng ka India bad United States naduh ki snem ba la leit tad haduh kane ka kynti. Kumta, u la ong ba ka long kaei- kaei kaba ngin sngew sarong bad ha kajuh ka por ruh ki dang don shibun bah ki jingiadei kam bad ki jingdonkam ban iasnoh kti lang nangne shakhmat ban wanrah ia ka lawei kaba bha ym tang ia ki arliang ri hynrei naka bynta ka jingbha jong ka pyrthei hi baroh kawei.
