Jowai, Jylliew 15:
Ka Luti Tuber Ïalong bad ka Mulang Ïalong ki la khur ïa ka jingjop ha ka lympung ïalehkai Third Division Football Tournament na ka bynta ka 3rd Adelbert Laloo Memorial Trophy.
Ïa kane ka lympung ïalehkai la pynlong da ka West Jaiñtia District Sports Association (WJDSA) ha madan Kiang Nangbah Stadium kaba ha Ladthadlaboh Jowai ha ka sngi palei.
Ha ka kynta ïakhun, ka Luti Tuber ïalong ka la pynliem noh ïa ka Youth Social Welfare Pynthor da 1-0 kol. Ïa kane ka kol jong ka Luti Tuber Ïalong la thep da u Phrangki Dhar ha ka minit kaba 41.
Ha kawei pat ka jingïakhun ka Mulang Ïalong ka la pynliem ïa ka Madan Thadmuthlong da 1-0. Ïa kane ka shi kol jong ka Mulang Ïalong la thep da u Dangaitlang Mulieh ha ka minit kaba 70+1.
Haba phai sha ka jingïalehkai kaba khatduh hapdeng ka Lumpyrtuh Mihmyntdu bad ka Royal Pole Mihmyntdu ki la ïasam mar shi point hadien ba ïakhaid mar 1-1 kol.
Ïa ka kol jong ka Lumpyrtuh Mihmyntdu la thep da u Nikhil Dkhar ha ka minit kaba 18, katba u Hamewan Sayoo u la lah ban pynïakhaid kylla na ka bynta ka Royal Pole Mihmyntdu ha ka minit kaba 70+2.
