Shillong, Jylliew 15:
Ka Ri Khasi Football Club ka la sdang ïa ka lympung ïalehkai phutbol ba la tip kum ka Invitation Open To All Football Tournament 2023 ha ka sngi Palei ha kaba ka Oste Phi Oiñ-A F.C. ka la khur ïa ka jingjop.
Kane ka nam jop ka la wan urlong hadien ba ka lah ban pynliem noh ïa ka Sunset Valley F.C da 4-0 kol ha madan Kurkalang kaba ha Bhoirymbong.
Ha kane ka jingïakhun baroh ar kynhun ki la pyrshang ban ïakhun tyngeh naduh kaba sdang ha kaba ym shym la don ba lah ban thep kol haduh kaba kut jong ka kylla step.
Dei ha ka kylla miet ba ka Oste Phi Oiñ ka la ïoh ban thep kol lyngba u Donlad Diengdoh ha ka minit kaba 46 & 72 bad u Risuk Malngiang ha ka minit ba 54 & 69 na ka bynta ban khur syndon ïa ka jingjop. Ïa ka nam ‘Man of the Match’ la khur da u Lastborn Mawphniang.
Ïa kane ka lympung la plie da u MLA barim katei ka thaiñ u Bah Ngaitlang Dhar ha ryngkat ka jingdon lang ki dkhot nongkitkam katei ka klob bad kiwei.
Nalor ka Oste Phi Oiñ bad ka Sunset Valley, ki la don sa kiwei pat ki kynhun ki ban ïashim bynta ha kane ka lympung kiba kynthup ïa ka Pahamrioh S.C, Ri Syon N.E.F.C, Oste Phi Oiñ-B F.C, Lajong F.C, Ehrngiew F.C, Beneris F.C, Nongkwar F.C, Galaxy Junior F.C, Ïaitylli Lang F.C, R.M.K. F.C, Blue Bumbar F.C, Pdeng Shnong, Mawryngkneng, Kharsyntiew F.C, Galaxy United, Umeit F.C, Sten United F.C, Jaguar F.C, Ibarial F.C, Lumdaitkhla S.C, Dieng Sma Ud F.C, Mawtneng S.C, P.F.R. Academy, M.L.P. F.C bad ka Mawlai F.C.
