Imphal, Jylliew:
Ka Sorkar Pdeng ka la kular ïa ka Sorkar Manipur ba kan ai ïa ka jingkyrshan ba pura ha ka jingpynthikna ka jingdon ki mar bam ha ki bynta bapher bapher jong ka jylla ha baroh ki por bad ba kito kiba ïoh jingmyntoi na ka NFSA kin bteng ban ïoh ïa kaba ki dei ban ïoh.
U Sanjeev Chopra, Secretary DFPD u la leit sha Imphal ha ka 14 tarik mynta u bnai ban khmih ïa ka jingpyntreikam ïa ka NFSA hadien ki jingkulmar ha Manipur. Ha kane ka sngi, u DFPD Secretary u la ïakynduh ïa u Myntri ba dei khmih ïa ka tnat Consumer Affairs, Food and Public Distribution (CAFPD) jong ka Sorkar Manipur – u L. Susindro Meitei bad u Chief Secretary – Vineet Joshi. Ka Sorkar Pdeng ka la pynbiang ruh sa 30,000 MT u khaw ïa ka Sorkar Manipur hapdeng ka jingkulmar na ka bynta 3 (lai) bnai – Jylliew, 2023 haduh u Nailar, 2023 na ka bynta kito ki bym ïoh jingmyntoi na ka NFSA.
Mynta ka jingdon ki mar bam ha ki 9 tylli ki jaka buh ka long 30600 MT kaba dap na ka bynta ka jingpynbiang 12000 MT ha ka shi bnai hapoh ka NFSA bad 6500 MT na ka bynta kito ki bym ïoh jingmyntoi na ka NFSA.
Shuh shuh, ka tnat ka dang wad ïa kiwei kiwei ki lad na ka bynta ka jingpynpoi mar bam lyngba ki lad na Dimapur, Silchar bad Bairabi sha Manipur bad ka jingwanrah 25500 MT u khaw sha ka jylla shuwa ban kut u Jylliew 2023. Ka jingantad ïa ka jingdon ki mar bam kan dap ïa ka jingdonkam ha u bnai ban wan. Yn pynthikna ïa ka jingbteng ka jingwanrah ïa ki mar bam khnang ba yn ym don kano kano ka jingduna mar bam ha kano kano ka bynta jong ka jylla.
