New Delhi, Jylliew:
Ka kynhun Myntri kaba pyntyllun ia ki kam ki jam jong ka kam ialehkai ha ka ri India baroh kawei mynta ka lah mynjur bad pdiang ia ka jingkyrpad jong ar ngut ki khlur ialehkai rah-nar ka ri, ka Mirabai Chanu bad Bindyarani Devi na ka bynta ka jingkyrpad ban shah ha ka ban leit shah hikai pyntbit ialade shabar na ka ri na ka bynta ka Target Olympic Podium Scheme Athletes, ha kaba kitei ki nongialehkai kin pynkhreh mynta ban leit sha ri USA ha ka jingpynkhreh bha na ka bynta ka jingshimbynta ha ka Asian Games.
Ia katei ka jingmynjur halor ka jingkyrpad jong kitei ki arngut lah ai ha ka por ba long ka jingialang ba dangshen jong ka Mission Olympic Cell (MOC). Kumta kitei ki khlur ialehkai rah-nar ka ri kin hikai pyntbit shuh shuh ialade ha St. Louis’s SQUAT University hapoh ka jingpeit jong u Dr. Aron Horschig bad ha ka jingpyntyllun ruh kumjuh ha kiwei pat ki bynta na ka bynta ka koit ka khiah ka jong ki ha shuwa ban plie pyrda ia ka Asian Games mynta u snem ha Hangzhou.
Kumta ha ki 65 sngi kynthih jong ka jingleit shah hikai pyntbit ka jong ki ar ngut, yn sa leit ban synranlang ruh ia ki da u Chief Coach ka ri u Vijay Sharma bad kiwei kiwei ki nongkitkam ba ha khmat.
