Shillong, Jylliew 15:
Ka lympung ïalehkai State Level Under-12 Football Tournament 2023 ba la pynïaid da ka tnat ïalehkai ka Sorkar Jylla ka la jan poi artad sha kaba kut ha kaba ki saw tylli ki kynhun na ri lum Khasi ki la ïoh rung sha ka final bad kin pynkhreh ban ïaknieh ïa ka nam lahduh ha ka sngi Thohdieng ha SAI Training Centre, Shillong.
Kine ki kynthup ïa ka West Khasi Hills bad ka East Jaiñtia Hills ha ka liang ki kynthei, katba ha ka liang ki shynrang ki long ka West Jaiñtia Hills bad ka Ri-Bhoi.
Ha ka jingïakhun semi final jong ki shynrang kaba la long ha ka sngi Palei, ka West Jaiñtia Hills ka la pynliem noh ïa ka Eastern West Khasi Hills da 2-0 kol. Ïa kine ki kol la thep da u Benedic War ha ka minit 4 bad ïa kawei pat la pynbud da u Ibamonhi Suting ha ka minit kaba 34. Katba na ka Eastern West Khasi Hills la lah ban pynphai kylla shi kol lyngba u Arki Mawlong ha ka minit kaba 24.
Ka Ri-Bhoi ka la lah ban pynliem noh ïa ka East Khasi Hills lyngba ka tie-breaker da 5-4 kol. Ha kane ka jingïakhun baroh ar kine ki kynhun ki la ïakhaid mar 2-2 kol. Ka East Khasi Hills ka la ïoh ban thep kol nyngkong lyngba u Bankyrshanlang Kharkongor (10) bad u Arkimeai Kharkongor (19), katba u Shanborlang Khongjee (45 & 49) u la lah ban pynphai kylla ar kol na ka bynta ka Ri Bhoi.
Haba phai sha ki jingïakhun semi final ki kynthei, ka West Khasi Hills ka la pynliem noh ïa ka East Khasi Hills da 2-0 kol. Ïa kine kol la thep da ka Nazarine D. Sangma ha ka minit kaba 23 bad ka Ibatyngkai Nongsiej ha ka minit ba 38.
Katba ka East Jaiñtia Hills ka la pynliem noh ïa ka South West Khasi Hills lyngba ka tie-breaker da 2-1 kol. Ha kane ka jingïakhun baroh ki kynhun ki la ïakhaid mar mar shi kol haduh kaba kut ka jingïalehkai. Ka East Jaiñtia Hills ka la pynkhih jar nyngkong eh lyngba ka Sharaihababet ha ka minit kaba 42, hynrei hadien shiteng kynta ka South West Khasi Hills ka la pynïakhaid kylla lyngba ka Felinda Pajuh ha ka minit kaba 35.
Ïa kane lympung yn pynkut noh ha ka sngi Thohdieng ha kaba ka Deputy Commissioner ka East Khasi Hills, Kong R.M Kurbar (IAS) kan long kum ka kongsan.
