Nongstoiñ, Jylliew 15:
Ka Khliehmawlieh Youth Club kaba la wan ha ka kyrdan ba-ar ha ka Super Division jong ka Nongstoiñ District Sports Association (NDSA), ka la pynpaw ba ka long ba la pynkhreh ban ïakhun ïa ka final jong ka Meghalaya State League ba la pynïaid da ka Meghalaya Football Association (MFA) ha ka sngi Saitjaiñ pyrshah ïa ka Rangdajied ha SSA Stadium, Polo.
Haba ïakren bad u nongthoh khubor, u Dr. Liverson Ïawphniaw, Vice Captain ka Khliehmawlieh u la pynpaw ka jingsngewkmen ba ka kynhun ka la lah ban jam shaduh ka final ha ka MSL. “Kane ka dei ruh lyngba ka jingkyrshan jong U Blei Trai Kynrad ha ka jingïaid lynti ha kane ka jingïakhun naduh kaba sdang haduh ban sa poi sha ka final.”
U la ai ruh ka jingkhublei kaba kyrpang ïa baroh ki rangïalehkai, u coach, ki nongpynïaid kiba la trei shitom na ka bynta ban jam shaduh kane ka kyrdan.
“Kum ka kynhun hi baroh kawei da i bor i barit eh kan long kaba la pynkreh ban ïa aireng ha ka final jong ka MSL 2023 pyrshah ïa ka Rangdajied, Ngi ngeit skhem ba lyngba ka jingïatreilang, ka kynhun ka don jingkyrmen ban ïoh kheit ïa u soh ka jingjop,” la ong utei u rangialehkai ka Khliehmawlieh.
Haba jubab kaei ka jingsngew jong ka kynhun hadien ba ka la lah jam sha ka final jong ka lympung ïalehkai MSL hadien ka jingpynliem ïa ka Mawlai SC, u Liverson u la ong ba ha kaba nyngkong um lah khlem da ai khublei bad ai jingïaroh ïa ka Mawlai Sport Club kaba long kawei na ki club ba paw ha ka Jylla bad kaba dei ruh ka lahduh jong ka Shillong Premier league jong ka aïom ba la lah. “Ki rangïalehkai ka Mawlai SC ki dei kiba la ju mlien ban ïalehkai bad kiba la ju ïashim bynta ha kiba bun ki lympung ïalehkai hapoh ka Jylla bad wat shabar ruh kumjuh”.
“Ngi la don ka mynsiem duh jingkyrmen lane sngewkhia ban ïalehkai, hynrei lyngba ka jingïatylli lang ki rangïalehkai ka Khliehmawlieh ka la pyrshang ban ïakhun tyngeh. Ha ka semi final (1st leg) ngi la ïalehkai bha ban iada na ka jingshah thep, hynrei ka Mawlai ka la ïoh ban thep shi kol,” u la bynrap.
“Hynrei ha ka semi final (2nd leg) ka Mawlai ha kaba sdang ka la pyrshang ban ïakhun tyngeh, hynrei da ka jingtrei shitom ki rangïalehkai ka Khliehmawlieh ka la lah ban pynphai kylla haduh lai kol kat haduh ban da khur syndon ïa ka jingjop.”
Utei u rangïalehkai ka Khliehmawlieh u la ong ruh ba ha kaba nyngkong ka Khliehmawlieh na kaba dei na West Khasi Hills bun sien ka ïoh ban ïalehkai ha ki madan ki bym pat biang lane ki ka madan khyndew, hynrei ha ka jingïalehkai jong ka MSL kaba long mynta u snem ka la ïoh ban ïalehkai ha Tura Zone. “Kum ka kynhun ka don ka jingkmen ha kaba ka ïoh ban kilanamet bad ban ïalehkai ha ka madan kaba biang kaba lada ngi pashat bol ruh kam don ka jingthud lane kam don ka jingjynjar ïa ki rangïalehkai bad ngi la ïoh ban ïalehkai ha ka madan phlang plastik (artificial turf) naduh ba sdang ha ka madan Chandmari.”
“Dei lyngba kane ka jingïoh ban ïalehkai ha katei ka madan kaba la pynshlur ïa ki rangialehkai haba ka ïakhun ia ka semi final pyrshah ïa ka Mawlai bad khamtam eh ha SSA Stadium,” u la bynrap.
Une u rangïalehkai ka Khliehmawlieh u la kyntu jur ïa ka Sorkar Jylla lyngba ka tnad ïalehkai ba kan leh eiei noh ha ka ban pynïoh madan ïalehkai ba paka ha Nongstoiñ khnang ba kin ïoh ïa ka lad ban kilanmet bad kin nanglah ban pynjanai shuh shuh ïa ka kam ïalehkai phutbol ha katei ka District.
Ha kawei pat ka liang, u manager ka kynhun u Bah Joyfulstar Marngar u la ong ba kum ka kynhun hi baroh kawei kam lah khlem da pynpaw ka jingaikhublei kyrpang ïa baroh ki paidbah nongkyrshan jong ka Khliehmawlieh khamtam na sor Nongstoiñ kiba la lah ban wan kyrshan ïa ka klob shaduh ki jingïalehkai kiba la long ha Tura bad ha nongbah Shillong ban wan ai mynsiem ïa ka kynhun hi baroh kawei ha kaba ym tangba ki wan ban kyrshan tang ka mynsiem, hynrei wat ban noh synñiang ruh ïa ki jingïarap ïa ka klob.
Kumta u la pynpaw ruh ka jingkhmih lynti ba kynhun kan ïalehkai bha ha katei ka jingïakhun final khnang ban lah ba ka ban pynurlong na ka bynta ban khur ïa ka nam lahduh. “Nga khmih lynti ba ki paidbah nongkyrshan kin wan ban ai jingkyrshah sa shisien pat ha katei ka jingïakhun final namar ka jingdon lang ki paidbah kan long ka jingai mynsiem ïa ka kynhun hi baroh kawei.”
