Bengaluru, Jylliew:
Na ka liang jong ka synjuk pyniaid jing-ialehkai Kriket hapoh ka ri na ka bynta kiba duna ka bor iohi ka Cricket Association for the Blind in India (CABI) ka pynbna mynta ia ka jingpynkhreh jong ka kynhun ialehkai ban shimbynta ha ka lympung ialehkai ka ban wan ka International Blind Sports Federation (IBSA) World Games 2023 ka ban sa long ha Birmingham.
Kumta katkum ka khubor ba lah ioh lum ka iathuh ba ia ki jingialehkai baroh ka tei ka lympung lah pynbeit ba kan sdang naduh ka 18-27 tarik u Nailar mynta u snem bad ruh ka jingialehkai Kriket na ka bynta kiba duna ka bor iohi lah kynthuplang ruh mynta ha ka World Games ha ka sien kaba nyngkongeh.
Shuh shuh ruh ka kynhun ialehkai jong ki shynrang bad kynthei ruh kumjuh jong ka ri ki lah dep ban pynrung kyrteng na ka bynta ka jingkhreh shimbynta jong ki ha ka lympung. Na ka liang jong ka CABI ka pynbna ruh ia ka kynhun ialehkai ba snar ba 16 ngut jong ki kynthei ki ban shimbynta ha ka lympung katba ki kyrteng jong ka kynhun ialehkai ki shynrang ynsa pynbna shen.
Ka kynhun ialehkai ka ri kan kynthup ruh ia ki 6 ngut ki nongialehkai na man la ka kyrdan jong ka B1 bad B3 bad 4 ngut ki nongialehkai na ka kyrdan B2. Ka tyllong khubor ka iathuh ba ka kynhun ialehkai jong ki kynthei ka lah dep ban shimbynta ha ka ha ki san tylli ki jingiakhun pyrshah ia ka Nepal ha Kathmandu kum ka jingpynkhreh jong ka na bynta ka World Games.
