Washington, Jylliew:
Ka United States ha ka Sngi Ba-ar ka la pynbna biang sa $325 ka song jingiarap sha ka tnat shipai jong ka Ukraine bad kane ka long ka jingpynbna kaba ka US ka la dep pyntip lypa ha ka taiew ba la leit.
Katei ka song ba $325 kan long naka bynta ban pynkhlaiñ ia ka tnat shipai jong ka Ukraine, haba iadei bad ki tiar jingdonkam ki ban iarap ia ka Ukraine ha ka jingiakhun thma jongka pyrshah ia ka Russia ha kane ka sien pynhiar kput jongka.
Katei ka song kan kynthup ruh ia ki ‘namding ‘High Mobility Artillery Rocket Systems’, ki kuli, ki tiar ban pynkhlaiñ ia ki tup- ki man, ki kali tur thma bad kiwei kiwei dei.
La ong ruh ba kitei ki jingiarap jong ka US ha kane ka kynti, ki long ruh ka lad ia ka jingiakhun shitom jong ka Ukraine ban ioh knieh biang ia baroh ki bynta kiba ka la shah knieh ha ka Russia ha ki por ba la leit.
Katei ka song jingiarap ha kane ka kynti kin kynthup ia 25 tylli ki kali tur thma, 15 tylli ki kali ‘Infantry Fighting Vehicles’ bad 6 tylli ki Stryker bad kumjuh kiwei kiwei de.
Kumjuh ruh na ka liang ka Ukraine, ka la kyntu ia ki para marjan ri na ka thaiñ West baroh kawei, ba kin ai ka jingkyrshan ba ratbah ia ka Ukraine ha kane ka kynti khnang ba kan lah ban iakhun pyrshah ia ka Russia da ka bor baroh kumba ka la pynkhreh baroh shi katta.
Ha kajuh ka por, la ong ba baroh ki jingiarap jong ka United States sha ka Ukraine ki la kot palat ia ka $40 Billion naduh kaba sdang jong ka jingleit hiar thma ka Russia pyrshah ia ka Ukraine ha u snem ba la leit.
