Jakarta, Jylliew:
Na ka liang jong u khlur ialehkai Badminton ka ri u Kidambi Srikanth u lah pyndonkam mynta ia kata ka jingtbit ialehkai ka jong u ha ka lympung ialehkai ba mynta ka Indonesia Open, tat haduh ba un da lah syndon ban pynliem noh ia uwei pat u rang-ialehkai ba tbit ka ri u Lakshya Sen ha baroh ki shi lynter jong ka jingialehkai ha ka kylla iakhun kaba ar jong ka ‘All-Indian Duel’ na ka bynta ban jam pat sa sha ka rynsan iakhun quarterfinal ha ka tei ka lympung.
Shuh shuh ruh ka khubor ka iathuh ba ka long ruh ka jingkut noh ka jingiaid lynti jong ka khlur ialehkai na ki kynthei ka PV Sindhu. Kumta haba phai sha ka jingiakhun hapdeng kitei ki arngut, ka long ka jing-iakhun kaba tyngeh hapdeng jong ki, hynrei u Srikanth u la lah ban khur shalade ia ki dor-thong ha ki bynta ba khameh jong ka jingiakhun da kaba pynjai-jai ka rukom ialehkai ba tbit kaba u lah sei na ka bynta ban khur shalade ia ka jingjop da 21-17 22-20.
Katei ka jingjop ka pynthikna ruh ia u Srikanth ia ka jinglah jong u mynta ban synshar halor u Sen ha kaba u lah khur ia ka rekod sha ka 3-0 ha ka jingiakynduh iakhun hapdeng ki arngut.
Kumta hadien katei ka jingjop, u Srikanth un hap ban pynkhreh bha shuh shuh ka rukom ialehkai ka jong u, ha kaba un iakynduh pat sa bad u rangialehkai ba tbit na China u Li Shi Feng; uba la lah ban pynliem noh ia u rangiakhun pyrshah na Singapore u Loh Kean Yew da 21-19 21-14.
Kumjuh ruh ka jingshah pynwai noh ka jingiaid lynti ka Sindhu ha katei ka lympung ialehkai ka long biang sa shisien ba ka lah shah pynliem ha ka por kaba kloi eh, ha kaba katei ka nongialehkai shah rem noh da 21-18 21-16 ha ka nongialehkai ba tbit na Chinese Taipei ka Tai Tzu Ying.
Kitei ki arngut ki lah dep ban iakynduh teng ha ka jingiakhun ka jong ki mynta u snem kata ha ka Sudirman Cup; ha kaba ka tei ka nongiakhun pyrshah jong ka Sindhu ka lah rah ia ka jingjop shalade da 21-14 18-21 21-17. Da katei ka jingshah rem noh ka Sindhu, ka jingiaid lynti ka kynhun ialehkai ka ri ha ka jingiakhun paramarwei jong ki kynthei ka lah poi sha kaba kut noh ha ka lympung.
