Bogota, Jylliew:
Kawei na ki thei ialehkai siat Khnam ka ri kaba dang khynnah ka Aditi Gopichand Swamy ka la lah mynta ban kamai shalade ia ki dor-thong 711/720 ha ka por ba long ka jingpyniakhun Compound kaba da 72 tylli ki Khnam jong ka kylla jied nongialehkai. Katei ka nongialehkai ka la lah ruh ban pynpra ia ka rekod ha ka U-18 ha ka por ba shimbynta ha ka lympung ialehkai kaba long mynta ha Colombia ka Archery World Cup Stage 3.
Shuh shuh ruh ka khubor ka iathuh ba ka Swamy ka lah iai pynbha bad pynjanai shuh shuh ia ka rekod barim kaba da 705/720 ia kaba lah thaw da ka nongialehkai na USA ka Liko Arreola bad ki dor-thong kiba ka Swamy ka kamai ki duna da tang ar na ka rekod ba la lah ban thaw da ka nongialehkai na Colombia ka Sara lopez da 713.
Katei ka nongialehkai ka ri ka la lah ruh ban thaw wat ia ka rekod ha ka Asian ha ka jngiakob siat 50m Compound ki kynthei ha ka kyrdan U-18. Kumta ka rukom ialehkai bha ka jong ka, ka pynbna thikna ruh ia katei ka nong-ialehkai ban wan ha ka kyrdan ba hajrong ha ka qualification round da kaba tam noh shakhmat mynta ia ka nongialehkai kaba na kajuh ka ri ka Jyothi Surekha Vennam kaba la lah ban khur haduh mynta ia ki 708.
