Shillong, Jylliew 15:
Ka Eastern Border Sports Association (EBSA) Mawsynram ka la pynkut noh ïa ka lympung ïalehkai phutbol ba la tip kum ka Super League 2023 ha ka 13 tarik mynta u bnai. Ha kane ka lympung ka Mawkhan SC ka la rah ïa ka nam lahduh lem bad ka song pisa kaba T. 1.50 lak.
Kane ka nam jop ka la wan urlong hadien ba la lah ban pynliem noh ïa ka Phlangmawsyrpat SC da 2-1 kol ha ka jingïakhun final kaba la long ha madan PWD kaba ha Mawsynram.
Kumba ka paw ka Phlangmawsyrpat ka dei ka kynhun kaba la wan ha ka kyrdan ba-ar ha u snem ba la lah, hynrei mynta u snem ka la ïai bat biang ïa kajuh ka kyrdan.
Ha kane ka sngi la ïadon lang u Myntri ka tnat ïalehkai ka Sorkar Jylla u Bah Shakliar Warjri kum u kongsan ha ryngkat u MDC ka Mawsynram u Bah Alvin K. Sawkmie, u E.E. ka PWD Mawsynram, ki ophisar ka tnat PWD, u Officer Incharge ka Mawsynram Police Station, u Rangbah Shnong & Secretary ka Shnong Mawsynram, bad ki riewrangbah bad ki padibah jong ka thaiñ.
Ka jingïakhun ha kane ka sngi ka la long kaba ïakhaid bha naba baroh ar kynhun ki la ïakhun tyngeh. Ha ka kylla step ka Mawkhan ka la ïoh ban pynkhih jar nyngkong. Hynrei wat la shah tam shi kol, ka Phlangmawsyrpat kam shym la duh jingkyrmen bad ka la ïakhun dohïap haduh ba kan da ïoh pynphai kylla na ka bynta ban ïakhaid mar shi kol.
Ha ka kylla miet baroh ar ki kynhun ki la trei shitom ban ïoh pynkhih biang ïa ka jar, hynrei da ka jingïaleh shitom ki rangïalehkai ka Mawkhan ka la ïoh ban thep ïa ka kol kaba ar bad ban khur syndon ïa ka jingjop.
Nalor ka Mawkhan, ka Phlangmawsyrpat kaba la wan ba-ar ka la khur ïa ka song pisa kaba T.50,000.
Ha katei ka sngi la ïoh ruh ïa ka jingkren pdiang na u Working President u Bah R. Hiamdor Rapsang uba la ïathuh ruh ïa ka jingïaid lynti ka synjuk bad ka rukom pynïaid ïa ki lympung ïalehkai.
Kumjuh u Bah Alvin kum u President u la ai khublei kyrpang ïa ki kynhun kiba la wan ban ïashim bynta bad khamtam ïa ki ar tylli kiba la poi shaduh final bad u kyrpad ïa ki paidbah ban ai ka jingïatreilang bad kyrshanlang ïa ka synjuk na ka bynta ka bha ka miat ka roi ka par ka thaiñ.
Ha kawei pat u Bah Shakliar u la ai jingïaroh ïa ka jinglah kane ka synjuk ban pynlong ïa kiba kum kine ki lympung bad u la ai ka jingkitbok kitrwiang ba kan nangkiew irat.
Nalor kata, u la ïathuh ruh ïa ka jingwan kyrpad kane ka synjuk ban pynïoh Stadium bad u la kular hakhmat ki hajar ngut ki paidbah nongwan peitkai baroh ba un pynïoh ïa ka Stadium ïa kane ka synjuk kaba la angnud la slem bad u kyrmen ruh ba ha kawei pat ka por un ïohi ïa ki paidbah ba kin shong ha ki gallery.
Ha kane ka sngi la pynbyrngia ïa ki paidbah nongwan peitkai da ki jingrwai na u nongrwai ba paw ka Ri Khasi u Bah Kupar Shadap.
