Shillong, Jylliew:
Kum shi bynta ban rakhe ïa ka jingdap 5 snem ka ‘Meghalayan Age’, ki nonghikai ka tnad pule ‘Arts & Culture’ jong ka Martin Luther Christian University, ki la pynlong ïa ka jingïalang halor ka phang, “The Meghalayan Age: Our Unique Geodiversity, Biodiversity and Cultural Assets”, ha ka Sngi Balang.
Ki nonghikai ka tnad pule ‘Arts & Culture’, MLCU ki kynthup ïa ka tnad pule Music; School of Language and Literary Studies; bad ka tnad pule Environment and Traditional Ecosystem. Ha kane ka jingïalang la ïasnoh kti lang ruh da ka tnad pule Tourism & Travel Management.
U Chancellor ka skulbah, Dr. Glenn C. Kharkongor u la ai ka jingbatai bniah lyngba ka ‘presentation’ halor ki tynrai jong ka ‘Meghalayan Age’ bad balei ba la ai kyrteng (jong ka Meghalaya) ïa kane ka juk thymmai ne ka ‘Geologic Age’.
Na ka liang u Dr. Kharkongor u la batai kumno ka Krem Pubon ha Mawmluh; kawei na ki krem kaba jrong bad ba jylliew jong ka Jylla ka la pyni ïa ki jinglong-jingman kaba biang ban pynneh-pynsah ïa ki dak ki shin haba ïadei bad ka jingkylla jong ka juk.
Ha kane ka sngi la sam ruh ïa ki khusnam sha ki nongjop jong ki jingïakop bapher-bapher kiba la pynlong ha shuwa jong ka taïew kaba la ïalam sha ka jingrakhe ïa ka ‘Meghalayan Age’.
Ki jingïakop ki kynthup ïa ka ïakop shon dur da ka ‘smartphone’, ‘digital’ bad ka jingïakop shna ‘Poster’ da ki kti bad ïa kine ki jingïakop la ïashim bynta da ki skul bad ki kolej bapher-bapher.
Ki nongjop ha ka ‘Handmade Poster Competition’ ki kynthup ïa ka Liza Rani Basumatary (banyngkong), Lady Keane College, Noor Bano (ba-ar), Lady Keane College bad Rodinal Lyngdoh (ba-lai), Shonroy Basan Secondary School.
Haba phai sha ka ‘Smartphone Photography Competition’ ka nam jop ka la leit sha u Albert Banlam, uba wan ba-ar u dei u Raymond Wellis War, MLCU, katba ka kyrdan ba-lai ka la leit sha ka Amandame Lywait, MLCU.
Shuh shuh ha ka ‘Digital Poster Competition’, ka kyrdan banyngkong ka la leit sha ka Fennyzia Marbaniang katba ka kyrdan ba-ar ka la leit sha ka Chanchal Loro – kine baroh ar ki dei ki samla pule ka MLCU.
