Wan poi ka kynhun CBI ha Guwahati ban shimti ïa ka mukotduma halor ka jingkhlad jong ka pulit SI

Guwahati, Jylliew:

Ka kynhun sorkar jong ka Central Bureau of Investigation (CBI) ha ka 14 tarik mynta u bnai ka la wan poi ha ka nongbah Guwahati na ka bynta ban shimti ïa ka mukotduma haba ïadei bad ka jingtohkit halor ka jingkhlad jong ka pulit Sub-Inspector (SI), ka Junmoni Rabha.

Kat kum ki jingïoh lum khubor la ïathuh ba ïa ka rai ban aiti ïa ka mukotduma na ka tnat CID Assam sha ka CBI la pynmih hadien ka jingleit jngoh jong u Director General of Police (DGP) ka Assam – GP Singh ïa ka shlem trei kam jong ka CBI kaba don ha nongbah Delhi.

Hapoh ka jingpynïaid jong u DIG Lovely Katiyar, ka kynhun CBI na ka nongbah Delhi ka la wan poi ha ka nongbah Guwahati ha ka miet jong ka sngi Balang ba la dep.

Shuh shuh la ïoh jingtip ruh ba ïa ka mukotduma la aiti ha ka CBI hadien ka jingai jingmut jong u Myntri Rangbah ka Assam – Himanta Biswa Sarma uba la bthah ïa u DGP ba un shim ïa ki sienjam kiba kyrpang halor katei ka jingjia. Dei hadien katei ka jingbthah ba u DGP ha ka 12 tarik mynta u bnai u la leit mih sha ka shlem trei kam jong ka CBI kaba don ha Delhi. Kat kum ki jingïoh lum khubor la ïathuh ba ha ka por ba u DGP u la leit mih sha ka shlem trei kam jong ka CBI, u la pynlong ruh ïa ka jingïalang kaba kyrpang bad ki heh sorkar ka CBI – ban kyntu ïa ka tnat ba kan shimti ïa ki mukotduma na ka bynta ban pynlong ïa ka jingtohkit kaba khuid ba suba bad kaba lait na kino kino ki jingpeit shiliang khmat.

Ka jingkhlad syndet jong ka Junmoni Rabha ka la wanrah ïa ka jingsuba sniew kaba jur ha kaba bun na ki paid nongshong shnong ka jylla Assam.