Agartala, Jylliew:
U nongïalam ba hakhlieh duh jong TIPRA Motha – Pradyot Debbarma ha ka 15 tarik mynta u bnai u la byrngem ba un pynjur shuh shuh ïa ki jingïakhih ha kaba ïadei bad ka jingdawa ban pyndonkam noh da ki dak thoh Roman na ka bynta ka ktien Kokborok.
Na ka liang u nongïalam jong ka TIPRA u la pynpaw ruh ïa ka jingpynrem kaba jur ïa ka tnat pulit jong ka jylla kaba la leit ban pynthut ïa ka rynsan ïaid paidbah ba la pynlong da ka Tipra Indigenous Students’ Federation (TISF) ha ka Sngi Balang mynta ka taiew.
Da kaba pynrem ïa ka tnat pulit jong ka jylla, na ka liang u Pradyot Debbarma u la pyntip ba lada ka sorkar Tripura kam shim khia halor ka jingdawa ban pyndonkam noh da ki dak thoh Roman na ka bynta ka ktien Kokborok, ka seng kan nang pynjur shuh shuh ïa ki jingïakhih ha ki sngi bad ki bnai ki ban sa wan.
Kat kum ki jingïoh lum khubor la ïathuh ba ha ka Sngi Balang ba la dep, ki la don palat 20 ngut ki samla pule kiba dei ki dkhot jong ka TISF kiba la ïoh ïa ki jingmynsaw hadien ba ki bor pulit jong ka jylla ki la pyndonkam da ki lathi bad da ki kali kit um ban pynsangeh ïa ka jingïalang paidbah kaba jai jai ba la pynlong da ka TISF.
Halor katei ka jingjia, na ka liang u Pradyot Debbarma u la pynpaw ïa ka jingpynrem kaba jur pyrshah ïa ka tnat pulit jong ka jylla kiba leit ban thombor ïa ki dkhot jong ka TISF. U la kyntoh ruh ba na ka liang u Lat ka jylla um shym la treh ban ïakynduh ïa ki nongïalam jong ka TIPRA bad kumjuh ruh ïa ki nongïalam jong ka TISF ban pynshah shkor halor ka mat jingdawa kaba ki don. U la kynthoh ba u Lat ka jylla u don ha Raj Bhavan baroh shi sngi, hynrei um shym la pyllait por wat tang 2 minit ruh ban ïakynduh ïa ki.
Na ka liang u Debbarma u la kyntu ruh ba u Lat jong ka jylla u dei ban pyndep ïa ki kamram ki jong u khlem da don ïa kano kano ka jingpeit shiliang khmat, namar dei ma u u ba la long kum u kynja ksiang jong ka Sorkar Kmie.
