Imphal, Jylliew:
U Myntri Rangbah jong ka jylla Manipur ha ka 15 tarik mynta u bnai u la pynbna paidbah bad kynnoh ba ki runar kiba la wan rung beaiñ na sha shiliang pud bad ki dkhot seng kieng atiar ki dei kiba la donkti ban pynmih ïa ki jingïakajia bad jingïaumsnam kiba jur ha ka jylla Manipur. U la pyntip shuh shuh ba ki jingïakajia ha ka jylla kim shym la dei satia na ka daw jong ka jingïashun hapdeng ki 2 tylli ki kynhun jaitbynriew.
Kum ban shu ïathuh hangne, ka jylla Manipur ka don ïa 400 km ka lynter khappud bad ka ri Myanmar, ka bym pat shym la ker sainar shiah.
Da kaba pynrem jur halor ka jingmih jong ka jingïather kuli ha ka miet jong ka Sngi Ba-ar kaba la jia ha ka thaiñ Imphal East district kaba la wanrah ruh ïa ka jingkhlad bad jingmynsaw jong bun ngut ki ‘riew paidbah – na ka liang u Myntri Rangbah u la ong ba katei ka jingjia ha katei ka miet ka dei ka kam beaiñ jong ki dkhot kieng atiar.
Ha ka jingïakren bad ki lad pathai khubor na ka liang u Myntri Rangbah u la pyntip ba na ka liang ki bor pahara ki la pynlong da ka jingleit khynra kaba jur khnang ban ïoh kem ïa ki runar na ka thaiñ Urangpat bad Yaingangpokpi. U la pyntip shuh shuh ba na ka liang ka sorkar jylla ka la pynkhreh ban ai da ka jingpynshitom kaba tyngeh ïa ki runar kiba la donkti ha ki kam beaiñ.
U Myntri Rangbah u la pyntip shuh shuh ba baroh ki Myntri bad ki MLA jong ka jylla ki la leit ban jurip ïa ki distrik bapher bapher bad ki la pynlong ruh ïa ki jingïalang syllok bad ki riew paidbah bad kiwei kiwei ki kynhun trei kam na ka bynta ban wanrah biang ïa ka suk ka saiñ ha ka jylla Manipur. U la pyntip shuh shuh ba shen ka komiti wanrah jingsuk (Peace Committee) kaba la thaw hapoh ka jingïalam jong u Lat ka jylla – Anusuiya Uikey kan sa pynsdang ïa ki kamram jong ka.
Ha ka jingïakren bad ki lad pathai khubor, na ka liang u Myntri Rangbah u la kyntait ruh ïa ka jingdawa jong ki 10 ngut ki MLA kiba na ka jaitbynriew Kuki kiba la dawa ban ïoh da la ka jong ka sorkar (kaba ïasyriem kum ka jingdawa ban ïoh ïa la ka jong ka jylla).
Dang ha ki khyndiat sngi kiba la leit noh, na ka liang ka Sorkar Manipur ka la leit ban pyntip sha ka Sorkar Pdeng ba ki 3 tylli ki kynhun kieng atiar na ka jaitbynriew Kuki (Kuki National Army – KNA, ka Zomi Revolutionary Army – ZRA) bad ka Kuki Revolutionary Army – KRA) kim shym la bud satia ïa ki kyndon jong ka soskular sangeh ïasiat ba la ïasoi ha ka 22 tarik u Nailar, 2022.
Na ka liang u Myntri Rangbah jong ka jylla la bun sien u la kynthoh bad kynnoh ba dei ki kynhun kieng atiar kiba na ka jaitbynriew Kuki kiba la donkti ban wanrah ïa ki jingïakajia ha ka jylla Manipur. U la kynthoh ruh ba kitei ki seng kieng atiar ki la don bynta ban pynshit bad ai mynsiem ïa ki paidbah ban ïakhun pyrshah ïa ka sorkar halor ki mat kiba ïadei bad ki sienjam ban rat dyngkhong ïa ka kam rep ‘tiew poppy bad kumjuh ruh ïa ka thma pyrshah ïa u droks.
