Shillong, Jylliew 16:
Wat la ka Jylla ka la phah haduh phra tylli ki kynhun ïalehkai sha ka 66th National School Games (NSG), hynrei ka la ïoh ban khur tang kawei ka takma ksiar bad takma rnong.
Ha kane ka lympung kaba la sdang naduh 6 haduh 13 tarik mynta u bnai ha ki lai tylli ki jaka kata ha Bhopal, Gwalior bad ha Delhi, ka Jylla ka la phah haduh 111 ngut ki nongïalehkai ki ban ïashim bynta ha ka Shoo-ting, Basketball, Boxing, Athletics, Judo, Football, Badminton bad Table Tennis.
Pynban haduh kaba kut jong kane ka lympung, ka Jylla ka la khur tang kawei ka takma ksiar na ka kynhun ïalehkai phutbol U-19 ki shynrang hadien ba ka lah ban pynliem noh ïa ka Punjab da 1-0 kol ha ka jingïakhun final. Katba ka kynhun jong ki kynthei ka la shah rem noh ha ka Jharkhand da 2-0 kol ha ka jingïaknieh ïa ka kyrdan balai (Third Place).
Kham ha shwa ka Jylla ka la khur ïa ka takma rnong na ka Athletics lyngba ka Rinalis Ingti ha ka jingïalehkai High Jump da kaba lah kynthih haduh 1.55 mitar.
Hato tang na ka Football bad Athletics ka la biang mo ïa ka Jylla ban khur takma bad balei na kiwei ki jingïalehkai kim lah ban leh bha ha katei ka lympung. Lada ka shu kheiñ ïa katei ka lympung tang kum ka tamasa, kan shu long kum ka pynsyrwa kai ïa ka pisa na ka bynta ki khynnah ïalehkai jong kitei ki phra tylli ki jingïalehkai ha ka leit ka wan da ka rel bad liengsuiñ ryngkat ka bam ka dih bad ki jaka sah.
Haba pyrshang ban wad jingtip halor kane ka jingbym lah ban ïalehkai ki khynnah ha katei ka lympung, ki la ai daw ïa ka jingshit jong ka suiñ bneng. Kawei pat ka daw kaba kum ki coach ki pynpaw ka long namar ba kim da ïoh tikna ban ai jinghikai ïa ki khynnah namar ka tnat ïalehkai ka ju phah ïa ki ba kin ïadon bynta ha kiba bun ki prokram. Nalor kata, ki la ïathuh ba la ju pynbunkam ïa ki haba don ki prokram kum ki Athletic Meet, Subroto Mukher-jee Cup bad kiwei, katba ki la hap ban iehnoh shadien ïa la ki jong ki prokram ai jinghikai na ka bynta ki khynnah.
Ym lah ban len ba don napdeng kitei ki phra tylli ki jingïalehkai ki bym ju pynlong ïa ki lympung ïalehkai hapoh ka Jylla (State Level) hashwa ba kin jied ïa ki khynnah ïalehkai ban leit ïashim bynta shabar jylla. Hynrei ki nongpynïaid jong ki synjuk ki la shu jied katba ki mon ïa kino kino ki khynnah bad wat ka tnat ïalehkai kam ju ïit bniah ïa kum kitei ki synjuk ki bym ju pynlong ïa ki lympung ïalehkai.
