Jakarta, Jylliew:
Ka jingiaid lynti jong ka kynhun ialehkai Badminton ka ri ha ka jiniakhun ba mar arngut ki shynrang kata u Satwiksairaj Rankireddy & Chirag Shetty ka la lah long kaba nang iai seisoh, ha kaba kitei ki arngut ki la lah ban pynliem noh ia ki rangiakhun pyrshah kata u Fajar Alfian & Muhammad Rian Ardianto ha baroh shi lynter jong ka jingialehkai na ka bynta ban jam pat sha ka rynsan iakhun semifinal ha ka lympung ialehkai ba mynta ka Indonesia Open World Tour Super 1000.
Shuh shuh ruh ha kaba iadei bad ka tei ka bynta jong ka lympung ialehkai, ka khubor ka iathuh ruh ba ka long ruh ka jingkut noh ka jingiaid lynti jong u Kidambi Srikanth na ka lympung hadien ba u lah mad ia ka jingshah pynrem noh ha u rangiakhun pyrshah na China u Li Shi Feng ha ka jingiakhun quarterfinal ka jong ki, ha kaba u Srikanth u lah shah rem noh da 14-21 21-14 12-21 ha ka jingiakhun kaba lah neh da 1 kynta 9 minit. Kumta katei ka jingjop ka plie ruh ha u Feng ia ka lad ka lynti na ka bynta ban iai pynneh biang sa shisien ia ka jingiaryngkat kyrdan ka jong u ha ka jingioh ban iakhun pyrshah bad u Kidambi kaba haduh mynta ka ieng da 1-1.
Haba phai pat sha ka jingiaid lynti jingjop da ka tei ka kynhun ialehkai ba mar arngut ki shynrang, u Satwik & Chirag kiba la lah ban ialehkai bha tad haduh ba kin da lah ban khur shalade ia ka jingjop ha ka jingiakhun kaba tyngeh ka jong ki na ka bynta ban pynliem noh ia ki nongiakhun pyrshah na Indonesia u Alfian & Adrianto da 21-13 21-13 ha ka jingia aireng kaba lah neh da 45min tam.
Hadien katei ka jingjop, ka khubor ka iathuh ba u Satwik & Chirag kin pynkhreh ruh sa na ka bynta ban ialehkai pyrshah bad ka kynhun ba rah ia ka nam lahduh ha ka quarterfinal; kata hapdeng ki rangialehkai na Korea u Min Hyuk Kang & Seung Jae Seo kiba iakhun pyrshah ia ki nongialehkai na Indonesia u Leo Rolly Carnando & Daniel Marthin. Haba phai pat sha ka jingiakhun hapdeng u Srikanth & Feng, ka khubor ka iathuh ba u Feng u lah wan sha ka bynta ba kham shakhmat ha ka jingiakhun kaba nyngkong watla u lah shimpor ban lait na ka jingshah khanglad ba dei u Srikanth uba lah plie nyngkong ia ka jingtam jingjop shakhmat da 2-0; ha shuwa ba u Feng un lah ha ka ban khyllie biang shalade ia ka jingjop da ki san dor-thong lynter kiba u la lah ban khur ha ryngkat bad kiba bun ki unforced errors ba lah pynmih da u Kidambi ha ka jingiakhun.
