Shillong, Jylliew 16:
Ka HYC Sengkmie hapoh ka jingïalam u Sports Secretary u Franky Kharumnuid ha ka sngi Thohdieng ka la pyllait paitbah ïa ka Jersey ïalehkai phutbol jong ka kynhun ki ‘thei ïalehkai ka PFR Football Academy, ki ban ïashim bynta ha ka Women’s League Tournament ban pynïaid da ka Shillong Sports Association.
Haba ai jingkren hadien ba la dep ban pyllait ïa ka Jersey ïalehkai (home & away) ha Madan Malki, Shillong, u Sports Secretary u la sneng la kraw bad ai mynsiem ïa kitei ki ‘thei ïalehkai ba kin trei shitom ha shwa ba kin leit ïashim bynta ha katei ka lympung, khnang ba kin dup poi sha kliar jong ka nam.
U la ai mynsiem ruh ba kin pyndonkam hok ïa ka sap kaba u Nongbuh Nongthaw u la ai ha ki bad ha kajuh ka por u la kyntu ruh ïa ki, ba kim dei ban klet pat ïa ka pule puthi.
Kine ki jersey ki long ka rong blue na ka bynta ka jingïalehkai ha la ïing bad ka rong stem na ka bynta ka jingïalehkai shabar.
