Beijing, Jylliew:
Ka China ha ka Sngi Palei, ka la pynher ia u roket 2D ba khlaiñ bor bha naka bynta ka jingleit buh ia 41 tylli ki satellite bad da kane, ka China ka la thaw rekod thymmai ruh ban long ka ri kaba leit buh ia shibun bah ki satellite tang shisien leit buh ha kajuh ka por.
Utei u roket u la mih na China ha ka por 1:30 noh phai sngi, na ka jaka pynher roket hi- ka Taiyan Satellite Launch Centre kaba don ha Shanxi. Katei ka jingleh jong ka China, ka long ruh tang shi taiew hadien ba ka la phah ia kawei ka kynhun jong lai ngut ki nongleit kiew haw-haw naka bynta ki kam jongka.
La ong ba ka jingthmu jong kitei ki satellite ka long ban phah ia ki jingtip kiba bniah sha ka tnat ba dei khmih jong ka China. Kham bun ruh na kitei ki satellite, ki dei ki jong ka Jilin-1 Series, kaba long ka tnat ba nyngkong eh jong ka China ka ban pyntreikam ia ki kor satellite.
Ka China ka la pynher ruh ia u satellite Jilin-1 ha u snem 2015, uba don kumba 420 kilogram ka jingkhia. Hynrei ha ki phra snem ba la leit, ka China ka la kam ba ka la lah ban pynduna ia ka jingkhia jong utei u roket shaduh ka 22 kilo syndon.
La ong ba ki jinglah jong ka China ha ka liang ki kam haw-haw ha kine ki sngi, ka la pyn lyngngoh ia kiba bun ki ri, khamtam ka United States. Ka Blomberg ha ki khyndiat por ba la leit jong une u bnai, ka la iathuh ba ka tnat haw-haw jong ka United States ruh ka thmu ban leit buh la ki jong ki satellite ha ki sngi ban wan, naka bynta ban ioh peit thuh bad ban syntiat ia ka jinglong jingman jong ka China bad Russia bad ka jingdon jong ki kali ne ki tiar ka China ne jong ka Russia, kiba lah ban wanrah jingma ne thombor ia ka US.
Nalor kata, la ong ba ka China ka dang trei shitom ruh ban wanrah ia ki satellite kiba kham biang shuh shuh bad ka thmu ban pyndep bad pyn urlong noh ia katei ka jingthmu hapoh jong u snem 2030.
