Seoul, Jylliew:
Ka tnat shipai jong ka Seoul ha ka Sngi Thohdieng ka la iathuh ba kawei ka jhad ‘submarine’ jong ka tnat shipai duriaw ka United States (US) kaba la leit poi sha ka jaka sangeh jhad hapoh ka nongbah Busan jong ka South Korea bad ka long ruh hadien ka jing byrngem bad jing maham jong ka North Korea haba iadei bad ka jingiadei kam hapdeng ka US bad ka South Korea.
Ka jingiadei hapdeng kitei ki ar tylli ki ri Korea ka la tlot bad hiar bha ha kine ki sngi, ha kaba u nongialam ka North Korea- u Kim Jong Un, u la bthah ia ki heh ba dei khmih ha ka tnat Nuclear jong ka ri bad ba kin pynmih kham bun ia kum kitei ki tiar Nuclear naka bynta ka jingpynkhreh ia ka ri ba kan lah ban ialeh pyrshah ia kino- kino ki jingeh ki ban wan hadien habud.
Ha kajuh ka por ruh, la ong ba ka South Korea bad ka United States ki la kular ban pynphai kylliang ia ka North Korea halor ki kam Nuclear kiba ka ju pyni bor bad wanrah jingma ia ki para marjan ri na ka por- sha ka por.
Kumta la ong ba ka USS Michigan, kaba long ka Nuclear Ohio-class Submarine jong ka US, ka la leit poi ha Busan ha ka Sngi Thohdieng ha ka sien kaba nyngkong eh hadien ki 6 snem ba ka US kan leh ia kane da ka jingkyrshan ia ka South Korea ha ka liang ka jingai jingiada.
Kumjuh ruh na ka liang ka United States ka la ong ba ka South Korea mynta ka la ioh jingkyrshan na ka US, da ki tiar Nuclear kiba khlaiñ bor ban ialeh pyrshah ia ki jingma kiba ap na ka North Korea ha kine ki sngi.
Katei ka submarine kaba don ia ka jingkhia palat 18,000-ton, ka don kumba 170 metre lane 560 phut ka jing jrong bad ka long kaba lah ban pyndait da ki ‘namding 150 Tomahawk ha ka jing jngai kaba haduh 2,500 kilometre (1,553 mile).
Namar kumba la iohi, ba ka North Korea ka la pynher ‘namding khah- khah ha une u snem, kynthup ia ka jingpyrshang pynher ia ki ‘namding kiba khlaiñ bor tam kiba ka don bad ha u bnai ba la leit, ka North Korea ka la pyrshang ruh ban leit buh ia ki ‘Spy Satellite’ sha ka haw-haw jongka.
Ka North Korea ha ka Sngi Thohdieng, ka dang dep pynher ia 2 tylli ki ‘namding kum shi bynta ban pynpaw ia ka jingbitar halor ka jingiatrei lang jong ka United States bad ka South Korea ban pyntbit bad ai jinghikai ia ki shipai jongki.
Kumta, ka North Korea ka kynnoh ba katei ka jingiatrei lang jong kitei ki 2 ri, ka long ka jing pynkhreh ban leit thombor ia ka North Korea ha ki sngi ki ban wan.
