Shillong, Jylliew 16:
Ka Khliehmawlieh Youth Club bad ka Rangdajied United FC ki long ba la pynkhreh ban ïaknieh ïa ka nam lahduh ha ka sien kaba nyngkong eh ha ka Meghalaya State League 2023.
Kine ki kynhun kin ïakhun ïa ka final mynta ka sngi Saitjaiñ ha SSA Stadium kaba ha First Ground, Polo ha ka por 3 baje janmiet. Shi kynta shwa ban sdang ïa ka jingïalehkai yn pynshongshit da ka nongrwai na Jylla ka Jessie Lyngdoh.
Kum ban shu pynkynmaw, ka jingïaid lynti kine ki kynhun ka la long kaba phylla namar kim shym la shah rem ha ki jingïalehkai group. Ka Rangdajied ka la ïoh ban bat ïa ka kyrdan ba hakhlieh jong ka Group-B bad ka Khliehmawlieh ha ka Group-D.
Kine ki kynhun ki la shah rem noh ha ka semi final jong ka wat ba nyngkong, hynrei ki la wanphai da ka jingkhlaiñ bor ha ka wat ba ar na ka bynta ban pynliem kylla ïa ki kynhun ka liang pyrshah. Ka Khliehmawlieh ka la lah ban pynliem kylla ïa ka lahduh jong ka Shillong Premier League ka Mawlai SC da 3-1 kol (3-2 on aggregate), katba ka Rangdajied ka la jop da 3-0 ïa ka Shillong Lajong FC, kaba dei ruh ka lahduh jong ka MSL 2019.
Lyngba kitei ki jingjop, baroh ar kynhun ki la khmih lynti ban ïalehkai bha ha ka final khnang ba kin lah ban kynjoh sha ka thong.
“Ka jingjop ha ka semi final ka long ka jingai mynsiem ïa ki rangïalehkai, hynrei ngin hap ban ïai bteng ban ïalehkai bha,” la ong u assistant coach ka Rangdajied u Aibanjop Shadap.
“Ki kynhun kiba ïoh rung sha ka final ki dei hok ban ïoh namar ki la trei shitom bad nga khmih lynti ba kin ïalehkai bha pyrshah ïa ka Khliehmawlieh,” u la bynrap.
Ka RUFC ka la don jingkyrmen ban ïakhun tyngeh ha kane ka jingïakhun final hadien ba jop da 3-0 kol bad na ka liang u kapten u Niawkorlang Kyndiah u la ong ba ki rangïalehkai ki la don ka jingïasngewthuh jingmut lang ban ïakhun tyngeh haduh kaba kut.
“Hadien ka wat kaba nyngkong ngi la sdang ban duh mynsiem ban pynphai ïa ki lai kol, hynrei ki la pyrshang ban ïakhun tyngeh ha ka wat kaba ar kat haduh ban wanphai da ka jingjop. Ngi da thrang eh ban khur ïa ka trophy bad ngi khmih lynti ban ïalehkai bha,” u la bynrap.
Wat la ka la shah rem ha ka Lajong ha ka final jong ka MSL 2019, hynrei kan long kaba kham khraw lada ka lah ban khur ïa ka jingjop ha kane ka kynti. Kumba ka paw dei tang ka RUFC kaba la rung final haduh arsien kynthih.
Haba phai sha ka Khliehmawlieh ka dei ka kynhun kaba dang thymmai bad ka bym pat ju lah ban ïalehkai bha ha ka jingïalehkai group ha u 2019. Kane kan dei ruh ka sien kaba nyngkong eh ba kan ïoh rung shaduh ka final.
Kane ka kynhun kaba na West Khasi wat la ka la shah rem ha ka wat kaba nyngkong ha Tura, pynban ka la lah ban pynpaw ïa ka jingtbit ha ka wat kaba ar kat haduh ba ka la lah ban pynliem noh ïa ka Mawlai ha kane ka nongbah hakhmat ki paidbah nongkyrshan.
“Ka jingangnud ka long ïa baroh ar ki kynhun. Ngin hap ban trei shitom naduh kaba sdang,” la ong u vice-captain ka Khliehmawlieh u Liverson Ïawphniaw. “Kan long ka jingsah kynmaw ïa ka klob hi baroh kawei bad ïa ka West Khasi Hills hi baroh kawei lada ngi lah ban ïoh rah ïa ka trophy nam lahduh.”
Ha kawei pat ka liang u Manager ka KYC, Bah Joyfulstar Marngar u la ai burom ïa ki paidbah nongkyrshan kiba la ïaid kylleng ban ai mynsiem ïa ka kynhun bad u la kyntu ba kin wan ban ai mynsiem biang sa shisien pat ha kane ka jingïakhun kaba kongsan eh.
Lah ban pynkynmaw ba ka Khliehmawlieh bad ka Rangdajied ki la ïakynduh teng ha ka MSL 2019 bad ka RUFC ka la jop da 1-0 kol.
