Mairang, Jylliew 16:
Ka kynhun ïalehkai jong ka Mawlyntriang Sports Club ka la khur ïa ka jingjop ha kaba sdang ïa ka lympung ïalehkai ba la tip kum ka “Tirot Sing Knockout Football Tournament 2023”.
Kane ka nam jop jong ka Mawlyntriang ka la wan hadien ba ka lah ban pynliem noh ïa ka Jakhong SC da 2-0 kol ha madan Nongrah, Nongkhlaw Eastern West Khasi Hills ha ka sngi Balang.
Ïa kane ka lympung la pynlong da ka Khasi Students’ Union (KSU) Nongkhlaw Circle ha kaba u samla Lambokstarwell Marngar, President rangbah ka KSU sengkmie u la long kum u kongsan.
Ka jingthmu jong katei ka lympung ka long shi bynta ban kyntiew ïa ka sap ka phong jong ki khun samla kiba don ïa ka sap ha ka jingïalehkai kynjat bol. Kane ka lympung ka long ruh kum shi bynta jong ka jingkynmaw burom ïa ka lyngkhuh sngi ïap kaba 188 jong u Pa’iem Tirot Sing uba long u khlawait ka ri.
Nalor u samla Lambokstarwell, la synran lang ruh u samla Samakha, Finance Secretary ka KSU WKHD kum u symbud kongsan ha ka jingdonlang ruh u President ka KSU Nongkhlaw Circle, ki nongkitkam lem bad kiwei kiwei.
