Bangkok, Jylliew:
Na ka liang jong ka Asian Cricket Council (ACC) ka pynbna khubor ba ka lympung ialehkai Kriket mynta u snem ka Asia Cup kan long naduh u Nailar jong ka 31 haduh ka 17 tarik u Nailur.
Kumta ha kaba iadei bad katei ka bynta, na ka liang jong katei ka synjuk ka iathuh ba ki kynhun ialehkai ha ka lympung ki kynthup ia ka India, Pakistan, Sri Lanka, Bangladesh, Afghanistan bad Nepal. Kine ki ri kin ia aireng para ma ki ha ki 13 tylli ki jingialehkai ODIs. Shuh shuh ruh ha ka jingpyllait khubor da ka ACC ka pynthikna ruh ba ka lympung ialehkai kan treikam lyngba ka ‘Hybrid Model’; ha kaba ka Pakistan kan ioh ban pynlong ia ki saw tylli ki jingialehkai katba ki jingialehkai kiba sah kata ki khyndai tylli yn pynialehkai ha Sri Lanka. Ka ACC ka iathuh ruh ba haduh mynta kam shym la don satia ka jingthikna ba ka Pakistan kan pynlong ia kino kino ki jingialehkai, hynrei katei ka rukom pyntreikam ba thymmai mynta yn shah ia ka tei ka ri ban pynlong ia ki katto katne ki jingialehkai ka lympung hadien 15 snem.
Kumta ruh ka bynta ba mynta jong katei ka lympung ialehkai kan don ia ki ar tylli ki group ha kaba ki ar tylli ki kynhun kiba wan sha ki ar kyrdan ba shakhmat kin jam sha ka rynsan iakhun Super Four. Hynrei katkum ka jingpyniaid jong katei ka synjuk ka long ba tang saw tylli ki jingialehkai yn lah ban pynlong mynta ha Pakistan katba ki 9 tyll9i ki jingialehkai kin long beit ha Sri Lanka.
Da kaba iai ban shuh shuh, ka Board of Control for Cricket in India (BCCI) bad ka Pakistan Cricket Board (PCB) ki don hapdeng ka jingiakhun jong ki ha kaba iadei bad ka madan ialehkai na ka bynta ki jingialehkai katei ka lympung kaba lah neh da ki bnai ha ka jingiahun ka jong ki, ha kaba ka BCCI ka lah kyntait ruh ban phah ia ka kynhun ialehkai na India sha Pakistan na ka bynta ki jingialehkai ha ka tei ka lympung kaba lah pynlong ruh ia ka ACC ban shim ia ka sienjam na ka bynta ban wad ki lad ki lynti bad ban ioh ia ka jubab ka ban pynhunlang ia ki arliang mamla.
Kumjuh ruh naba ka Pakistan ka pynpaw ia ka jingbym sngewbha ka jong ka ban pynkynriah ia baroh kawei ka lympung ialehkai na ka ri, kumta na ka liang jong u nongpyniaid bahakhliehduh ka PCB u Sethi u lah wanrah shakhmat ia ka jingai jingmut ka jong u na ka bynta ban pyntreikam noh da ka ‘Hybrid Model’ ha kaba yn sa sakh ia ki katto katne ki jingialehkai ka lympung ki ban long ha ka ri Paskistan bad katto katne ha Sri Lanka.
Ka jingpynjlan ha ka ban pynlong ia ka tei ka lympung ka lah ktah ruh ia ka prokram ialehkai jong ka lympung iakhun World Cup ia kaba lahdep ban pynbeit ba kan long ha India mynta u snem. Kumta da ka jingpoi mynta sha ka bynta ba kut jong katei ka lympung ban sa wan bad kumjuh ruh ha kaba iadei bad ki madan ialehkai jong ki jingialehkai, ka ICC ka pynpaw mynta ba shen kan sa pynbna ruh ia ka prokram ialehkai jong ka lympung ialehkai World Cup.
