Shillong, Jylliew 16:
Ki khynnah ïalehkai ka Ri Bhoi bad West Khasi Hills ki la khur ïa ka nam lahduh ha ka lympung ïalehkai State Level Under-12 Football Tournament 2023 ba la pynïaid da ka tnat ïalehkai ka Sorkar Jylla.
Ha ka jingïakhun final jong ki khynnah shynrang, ka Ri Bhoi ka la pynliem noh ïa ka West Jaiñtia Hills da 4-0 kol bad u Shanborlang Khongjee u la khur ïa ka hat-trick.
Kane ka jingïakhun final ka la long kaba itynnad bha naba baroh ar kynhun ki la ïakhun tyngeh naduh kaba sdang, hynrei ki khynnah ka Ri Bhoi ki la long kiba khlaiñ bor bad ka la ïoh ban thep kol tang mar sdang ka jingïalehkai lyngba u Shanborlang ha ka minit kaba 2. Hadien katto katne por kane ka kynhun ka la pynbud biang ïa ka kol kaba ar lyngba u Prin Lang Roi ha ka minit kaba 20 na ka bynta ban tam da 2-0 kol.
Hadien shiteng kynta u Shanborlang u la pynbud biang ïa ka kol kaba ar ha ka minit kaba 37 bad u la khur ruh syndon ïa ka hat-trick hadien ba u la ïoh ban thep biang ha ka minit kaba 50.
Haduh kaba kut jong ka jingïalehkai, ka West Jaiñtia Hills kam shym lah ban pynphai bad ka la mad ïa ka jingshah rem.
Haba phai sha ka jingïakhun ki khynnah kynthei, ka West Khasi Hills ka la lah ban pynliem noh ïa ka East Jaiñtia Hills lyngba ka tie-breaker da 4-2 kol hadien ba kim shym lah ban thep kol haduh kaba kut ka jingïalehkai.
Ïa ka nam Best Goalkeeper ha ka liang ki shynrang la khur da u Subhrata Rabha na North Garo Hills bad ïa ka nam Best Player la ïoh da u Shamiki Myrchiang na West Jaiñtia Hills. Katba ha ka liang ki kynthei ïa ka nam Best Goalkeeper ka leit sha ka Larishisha Dkhar na ka East Jaiñtia Hills bad ïa ka Best Player la ïoh da ka Nazarine D. Sangma na West Khasi Hills.
Ïa ki khusnam sha kine ki kynhun la sam da ka Deputy Commissioner ka East Khasi Hills, Kong R.M Kurbah (IAS) kum ka kongsan ha ka jingïadon lang u Working President ka MSOA, Bah John F. Kharshiïng kumjuh u Assistant Director ka tnat ïalehkai, Bah Paia War Nongbri bad kiwei.
