Imphal, Jylliew:
Ki bor sorkar jong ka jylla Manipur ki la pyntip ba ha ka miet jong ka Sngi Palei (15 tarik), ki runar ki la leit ban wiang ding ïa ka ïing sah jong u Myntri Khynnah ka tnat Korbar Ri – RK Ranjan Singh kaba don ha ka thaiñ Kongba, Imphal.
Kat kum ki jingïoh lum jingtip la ïathuh ba ha katei ka miet, ki paidbhur ki la leit ban tur sha ka ïing sah jong u myntri bad wiang ding ruh ïa ka.
Kat kum ki jingïoh lum khubor la ïathuh ba ha ka Sngi Palei, ki la don 2 tylli ki ïing kiba la shah wiang ding ha ki paidbhur – shi sngi hadien ka jingjia shah thombor ka thaiñ Khamenlok – kaba la wanrah ruh ïa ka jingkhlad jong 9 ngut ki briew bad jingmynsaw ïa ki 10 ngut kiwei pat.
Halor kitei ki jingjiaa, na ka liang u Myntri Rangbah jong ka jylla – N Biren Singh u la pyntip ba ka sorkar jylla ka la pynlong ïa bun tylli ki jingïalang bad pynmih ruh ïa ka rai ban trei tyngeh pyrshah ïa ki runar kiba la donkti ha ki kam beaiñ. U la ïathuh ba na ka liang u Lat ka jylla u la dep ban thaw ïa ka komiti wanrah jingsuk (peace committee) bad shen katei ka komiti kan sa shim ïa ki sienjam kiba donkam na ka bynta ban wanrah biang ïa ka suk ka saiñ ha ka jylla Manipur. Na ka liang u Myntri Rangbah u la pyntip shuh shuh ba ka suk ka saiñ kan wanphai biang sha ka jylla Manipur lyngba ka jingïatreilang bad jingai jingkyrshan jong ki paidbah nongshong shnong.
Dang shen na ka liang u Myntri ka Tnat Kam Pohïing jong ka Sorkar Pdeng – Amit Shah ha ka jingwan jngoh jong u ïa ka jylla Manipur (29 Jymmang – 1 Jylliew), u la pynmih da ka jingmaham pyrshah ïa ki seng kieng atiar Kuki ba ki dei ban bud pyrkhing ïa ki kyndon jong ka soskular lada kim kwah ba ka Sorkar Pdeng kan shim da ki sienjam kiba tyngeh pyrshah ïa ki.
