Guwahati, Jylliew:
U Myntri ka tnat Pule Puthi jong ka jylla Assam – Ranoj Pegu ha kane ka taiew kaba mynta u la pyntip ba 2 tylli ki kolej kiba bna nam jong ka jylla Assam kin sa shah ban pynkiew noh sha ka kyrdan kum ki skulbah jong ka jylla. Ïa katei ka rai jong ka sorkar, u Myntri u la pynbna paidbah ha ka jingïalang kaba la pynlong ha Guwahati ha ka 15 tarik mynta u bnai.
Ki 2 tylli ki kolej ki ban sa shah pynkiew kyrdan kum ki skulbah ki kynthup ïa ka North Lakhimpur College bad ka Sibsagar College.
Na ka liang u Myntri u la pyntip shuh shuh ba ka sorkar jylla ka la pyllait ïa ka mang tyngka kaba mar T.10 lak sha kitei ki 2 tylli ki kolej ki ban sa kiew kyrdan kum ki skulbah.
Kat kum ki jinglum jingtip la ïathuh ba ka North Lakhimpur College ka dei ka ‘autonomous college’ kaba hap hapoh ka jingkhmih jong ka Dibrugarh University, Assam. Ka North Lakhimpur College ka dei ka ‘autonomous college’ kaba nyngkong eh ha ka jylla Assam ïa kaba la seng ha u snem 1952.
Ha u snem 2012, ka North Lakhimpur College ka la ïoh ïa ka Grade “A” na ka NAAC ha ryngkat ka 3.08 ka CGPA. Dei ha ka 30 tarik u Jymmang, 2013 ba ka North Lakhimpur College ka la ïoh ïa ka shithi na ka University Grants Commission ban ïoh jingithuh noh kum ka ‘autonomous college’.
Haba phai sha ka Sibsagar College pat la ïathuh ba katei ka kolej ka dei ka jaka pule kaba pynbiang ïa ka lad jingpule ‘graduate’ bad ‘postgraduate’; kaba hap hapoh ka jingpynïaid jong Dibrugarh University.
Ïa katei ka kolej la seng ha u snem 1947 da u Padmadhar Chaliha bad u khun jong u – Paragdhar Chaliha u la don bynta ban pynwandur ïa ka. Mynshwa katei ka kolej ka hap hapoh ka jingkhmih bad jingpynïaid jong ka Gauhati University, bad dei naduh u snem 1965 ba katei ka kolej ka la hap noh hapoh ka jingkhmih bad jingpynïaid jong ka Dibrugarh University.
Katei ka kolej ka don ha ka jaka sha ka thaiñ mihngi jong ka Joysagar Tank bad ka jngai kumba 5 km na ka shnong Sivasagar. La tei ïa ka ha ka jaka kaba ïar haduh 103 bigha bad ka don ruh ïa haduh 16 tylli ki tnat jingpule lane ki ‘department’.
