Jowai, Jylliew 18:
Ka lympung ïalehkai jong ki khynnah skul kaba tip kum ka “District Level Inter School Subroto Cup Football Tournament” ba la pynïaid da ka ophis u District Sports Officer (DSO), West Jaiñtia Hills District kan sdang ha ka 20 tarik Jylliew.
Ka jingïakhun kan sdang naduh ka por 8.00 baje mynstep haduh 3.30 janmiet ha ki artylli ki madan ïalehkai kata ha madan Kiang Nangbah Stadium Ladthadlaboh, Jowai bad ha madan ïalehkai ka Kiang Nangbah Govt. College.
Ki skul ki ban ïashim bynta ha kane ka lympung ki don haduh 54 tylli kiba kynthup 28 tylli ha ka kyrdan Under-17 Boys bad 26 tylli ha ka kyrdan Under-14 Boys.
Ha ka sngi sdang jong ka lympung yn pynïakhun tang ha ka kyrdan Under-17.
Ki skul ki ban ïalehkai ha madan Kiang Nangbah Stadium, ki long ka Ladthadlaboh Sec School pyrshah ïa ka Ïalong Sec School ha ka por 8.00 baje mynstep. Ka Laishnong H/S School pyrshah ïa ka Lumpyrtuh Sec School ha ka por 9.30 mynstep. Ka Khimusniang Presbyterian Sec School pyrshah ïa ka Nartiang Presbyterian H/S School ha ka por 11.00 baje mynstep. Ka Achiever’s Sec School pyrshah ïa ka JNV School ha ka por 12.30 nohphai sngi. Ka Amwi H/S School Thangbuli pyrshah ïa ka Ummulong Presbyterian H/S School ha ka por 2.00 baje nohphai sngi.
Katba ha madan Kiang Nangbah Govt. College ki long ka Muthlong Pioneer Sec School pyrshah ïa ka Jowai District Presbyterian Sec School, Ïalong ha ka por 9.30 mynstep. Ka RC Eve Sec School pyrshah ïa ka Seiñraij H/S School ha ka por 11.00 baje mynstep. Ka Police Public Sec School pyrshah ïa ka Mang Hai Ryum Sec School ha ka por 12.30 mynsngi. Ka Marian Hill H/S School pyrshah ïa ka Jaintia H/S School ha ka por 2.00 baje nohphai sngi. Ka Jowai Presbyterian H/S School pyrshah ïa ka Trangblang Govt UP & RMSA ha ka por 3.30 janmiet.
