Agartala, Jylliew:
Kum shi bynta na ka rynsan jong ka “Fruit Diplomacy,” ka Myntri Rangbahduh jong ka ri Bangladesh – Sheikh Hasina ha ki khyndiat sngi ba la dep ka la phah sngewbha da 500 kilograms u sohpieng sha u Myntri Rangbah jong ka jylla Tripura – Dr. Manik Saha.
Kat kum ki jinglum jingtip la ïathuh ba katei ka rynsan ka dei shi bynta na ka sienjam ban pynkhlaiñ bad kyntiew ïa ka jingïadei paralok hadpeng ka ri India bad ka ri Bangladesh. La ïoh jingtip ba dei ha ka 15 tarik mynta u bnai, ba ki sohpieng ba la phah da ka Myntri Rangbahduh ki la wanpoi ha ka nongbah Agartala ha ka por 12 baje nohphai sngi lyngba ka khyrdop khappud Agartala – Akhaura (Integrated Check Post)
Ha katei ka sngi la ïathuh ba na ka liang u Assistant High Commissioner jong ka ri Bangladesh ha Agartala – Arif Mohammad, lem bad u First Secretary jong ka Embassy – Rezaul Haque Chowdhury, u First Secretary – Al Amin, bad kiwei kiwei ki heh sorkar ki la ïadonlang ha khappud Akhaura ban leit pdiang sngewbha ïa ki sohpieng ba la phah da ka Myntri Rangbahduh.
Ha katei ka sngi, na ka liang u Arif Mohammad u la pynpaw ïa ka jingkmen kaba khraw bad ong ruh ba katei ka sngi ka dei ka sngi ka ban sah kynmaw namar ba ka Myntri Rangbahduh ka la phah haduh 500 kilo u sohpieng sha u Myntri Rangbah jong ka jylla Tripura. U la ong shuh shuh ba katei ka sienjam ym tang ba ka la wanrah ïa ka jingkmen, hynrei ka pynkhlaiñ shuh shuh ïa ka jingïadei hapdeng ka jylla Tripura bad ka ri Bangladesh.
Hadien ba la leit pynpoi ïa ki sohpieng sha ka ïïng sah jong u Myntri Rangbah ka jylla, na ka liang u Dr. Manik Saha u la pynbna paidbah ruh halor katei ka jingai sngewbha jong ka Myntri Rangbahduh. U la pyntip ruh ba kum u nongmihkhmat jong ka jylla Tripura u ai ïa ka jingkhublei kaba khraw ïa katei ka kam sbun jong ka Myntri Rangbahduh.
