Tinsukia, Jylliew:
Ki bor pulit jong ka jylla Assam na ka thaiñ West Karbi Anglong ha ka 16 tarik mynta u bnai ki la ïoh ban kem ïa 3 ngut ki runar (kynthup ïa 2 ngut ki nongtrei jong ka shlem trei kam u Deputy Commissioner ka thaiñ Tinsukia) na ka daw jong ka jingdonkti jong ki ha ki ban lum pisa beaiñ na katto katne ngut ki nongshong shnong ka thaiñ ha ryngkat ka jingkular ba kin pynbiang ïa ki kam ki jam sorkar.
Ki 3 ngut ki runar kiba la shah kem ki kynthup ïa u Deepak Thapa, Pradeep Tantiya nongtrei ka shlem trei kam u DC bad u Anil Moran – nongshong shnong ka thaiñ Makum.
Kat kum ka jingïathuh jong ki bor pulit, ki la pyntip ba hadien ba ki la ïoh jingtip shaphang ka kam beaiñ jong kitei ki 3 ngut – ki bor pulit ka thaiñ Hamren ki la pynlong da ka jingtohkit, bad dei na ka thaiñ Tinsukia ba ki la ïoh ban kem ïa kitei ki 3 ngut.
Na ka liang ki bor pulit, ki la pyntip ba kitei ki 3 ngut ki la donkti ban leit ai ïa ki shithi thung kam kiba shukor sha ki katto katne ngut ki nongshong shnong ka thaiñ. Hadien ka jingshah kem la ïathuh ba ïa kitei ki 3 ngut la leit ban ïalam noh sha ka thaiñ Karbi Anglong district na ka bynta ban pynlong shuh shuh ïa ki jingtohkit kiba bniah.
Na kitei ki 3 ngut, ki bor pulit jong ka thaiñ ki la ïoh ruh ban kurup ïa ki tiar ‘computer’ bad kiwei kiwei ki jingdon jingem. Ïa kitei ki 3 ngut shuh shuh la leit ban rah tian bishar ruh shakhmat ka ïing kashari bad na ka liang ka ïing kashari ka la pynmih da ka rai ba ki dei ban don hapoh ka jingshah tohkit ha ki bor pulit ka ban neh haduh 3 sngi. Na ka liang ki bor pulit la ïathuh ba ki la pynlong ïa ki jingtohkit ban lap la kitei ki 3 ngut ki la donkti ruh ha kiwei kiwei ki kam beaiñ ban kular pynïoh kam ïa ki nongshong shnong da kaba shim pisa na ki.
