Imphal, Jylliew:
Haduh 9 ngut ki pulit jong ka jylla Manipur ki la shah weng kam noh ha ka Sngi Palei kaba la dep hadien ba ka ïing sah jong ka Myntri ka tnat pynïaid karkhana Iindustry) – Nemcha Kipgen ka la shah wiang ding ha ki paidbhur ha ka janmiet jong ka Sngi Balang ba la dep (14 tarik u Jylliew, 2023).
Kat kum ka jingïoh lum jingtip la ïathuh ba kitei ki 9 ngut ki pulit ki la shah weng kam noh na ka daw jong ka jingbym shim khia jong ki ban pahara janai ïa ka ïing sah jong katei ka Myntri kaba don ha ka shnong Lamphel, Imphal.
Nalor ka jingshah weng kam, la ïathuh ba kitei ki 9 ngut ki pulit kin hap ruh hapoh ka jingshah tohkit kaba bniah ha ka tnat Kam Pohïing jong ka jylla Manipur.
Kat kum ki jingïoh lum khubor la ïathuh ba ka ïing sah jong ka Myntri ka la shah wiang ding hadien ka jingjia shah pynïap jong 9 ngut ki riew paidbah ha ki runar kiba la suba jur ba ki dei ki dkhot jong ki seng kieng atiar. Katei ka jingjia ka la jia ha ka shnong Khamenlok. Kat kum ki jingïoh lum jingtip la ïathuh ba ka Nemcha Kipgen ka dei kawei na ki 10 ngut ki MLA kiba na ka jaitbynriew Kuki kiba la kyrpad na ka Sorkar Pdeng ban pynïoh noh da la ka jong ka bor synshar na ka bynta ki paid Kuki jong ka jylla Manipur.
Ha ka por ba shah wiang ding ka ïing sah, la ïathuh ba na ka liang ka Myntri kam shym la don satia ha la ïing. Tad haduh kane ka kynti kaba mynta la ïathuh ba kim pat shym la don satia kino kino ki kynhun runar ne ki kynhun kieng atiar kiba la wan shakhmat ban kam ïa ka jingdonkti ka jong ki ha katei ka kam beaiñ.
