Itanagar, Jylliew:
U Myntri Rangbah jong ka jylla Arunachal Pradesh – Pema Khandu ha ki khyndiat sngi kiba la leit noh u la pyllait paidbah ïa kawei ka ‘app’ kaba la tip kyrteng kum ka ‘Arunpol App’ ka ban trei kam na ka bynta ka tnat pulit jong ka jylla Arunachal Pradesh. Ha katei kajuh hi ka sngi, na ka liang u Myntri Rang bah u la kaweh lama pynsdang ruh ïa ka jingpynsdang trei kam ïa ka “APP Awareness Generation Vehicle” ha ka jingïalang kaba la pynlong ha Civil Secretariat, Itanagar.
Haba ai jingkren ha ki lad pathai kbubor, na ka liang u Myntri ka Tnat Kam Pohïing jong ka jylla – Bamang Felix u la pyntip ba ka “Arunpol App” kan pynsuk ïa ki nongshong shnong ‘riew paidbah jong ka jylla ha ki kam kiba ïadei bad ka jingleit ujor ne leit mudui ïa ki mokotduma sha ka tnat pulit khlem da donkam ban leit mih sha ki thanat pulit.
Na ka liang u Myntri u la ong shuh shuh ba ki nongshong shnong ka jylla kin lah ruh ban pyndonkam ïa katei ka ‘app’ na ka bynta kiwei kiwei ki jait kam kiba ïadei bad ka tnat pulit jong ka jylla. Halor ka jingpyllait paidbah ïa ka kali ‘Arunpol Seva Van,’ na ka liang u Felix u la pyntip ba ïa katei ka kali yn phah sha ki thaiñ bapher bapher ban lum jingtip halor ki jingeh kiba ki paidbah ki ju ïakynduh bad kumjuh ruh na ka bynta ban pynlong ïa ki rynsan pynsngewthuh paidbah ki bapher bapher.
Ha katei ka sngi, na ka liang u Myntri u la pyntip ruh ba u Myntri Rangbah jong ka jylla – Pema Khandu u la pyllait paidbah ruh sa ïa kawei ka ‘app’ kaba la tip kyrteng kum ka “E-Vigilance app” ka ban trei kam na ka bynta ki nongtrei sorkar jong ka jylla. Na ka liang u Myntri u la pyntip ba katei ka ‘app’ kan ai jingmyntoi bad pynsuk ïa ki nongtrei kam sorkar jong ka jylla halor ki kam kiba ïadei bad ka jinglah ban pyndep kloi ïa ka ‘vigilance clearance.’
