Aizawl, Jylliew:
Ki nongmihkhmat kiba dei na ka jaitbynriew Meitei ha ka 14 tarik mynta u bnai ki la leit ban ïakynduh ïa u Lat jong ka jylla – Dr Hari Babu Kambhampati ha Raj Bhavan. Ha katei ka jingleit kynduh ïa u Lat, na ka liang ki nongmihkhmat jong ki paid Meitei kiba na ka jylla Mizoram ha kaba nyngkong eh ki la pynpaw ïa ka jingsngewnguh kaba khraw ïa ka seng YMA, ki nongïalam seng samla pule bad ïa ki kynhun imlang sahlang kiba kloi ban sngewthuh bad ai jingkyrshan ïa ki paid Meitei kiba la wan ban rieh tngen ha Mizoram.
Na ka liang kitei ki nongïalam ki la pynpaw ruh ïa ka jingsngewkhia bad jingsngewsih kaba jur halor ka jingmih jong ki jingïakajia bad jingïaumsnam kiba jur kiba la jia ha ka jylla Manipur naduh ka 3 tarik jong u bnai ba la dep.
Na ka liang ki nongïalam, ki la kyrpad na ka bynta ban wanrah biang ïa ka shong suk shong saiñ ha ka jylla Manipur bad kyrpad ruh ïa ki bor sorkar kiba halor ba kin shim ïa ki lad ki lynti kiba bha tam na ka bynta ban wanrah biang ïa ka shong suk shong saiñ ha Manipur.
Na ka bynta ban wanrah biang ïa ka shong suk shong saiñ ha Manipur, kitei ki nongïalam jong ki paid Meitei ki la phah ruh da ka dorkhas sha ka President jong ka ri India lyngba ka shlem trei kam jong u Lat ka jylla Mizoram.
Kat kum ki jingïoh lum khubor la ïathuh ba ha ka jingïalang kaba la pynlong ha ka 12 tarik u Jylliew, ka NGO Coordination Committee ka la pynmih ïa ka rai ban ai jingkyrshan ïa ki nongshong shnong trai muluk jong ka jylla Manipur.
Ha ka jingïalang jong ka NGO Coordination Committee, la pynbna ruh ba ïa ka jingïalum lang (Solidarity Gathering) yn pynlong ha ka 23 tarik mynta u bnai habar jong ka ïing sah jong u Lat ka jylla. Na ka liang ka komiti ka la ïawer ruh ïa baroh ki paid Mizo ba kin wan ban ai ïa ka jingkyrshan kaba shit rhem ha katei ka rynsan ïalum paidbah.
Kum ban shu ïathuh hangne, ka NGO Coordination Committee ka dei ka komiti synrop trei kam jong ki kynhun trai kam bapher bapher kiba kynthup ïa ka Central Young Mizo Association, Mizoram Upa Pawl, Mizo Hmeichhe Insuihkhawm Pawl, Mizo Zirlai Pawl bad ka Mizo Students Union.
