Tokyo, Jylliew:
U Myntri Rangbah-duh ka Japan, u Fumio Kishida ha ki khyndiat sngi ba la leit u la plie thymmai ia ki skhim bad ki jingmyntoi naka bynta ki paidbah kum shi bynta ban pynkylla ia ka rukom shongkha- shongman bad ka roi-ka par hapoh ka ri da kaba pynheh ia ka jingsiew sha ki longïing kiba don khun.
Kane ka jingpynbna ka long hadien ka khubor ba la ïohsngew ba u Kishida un sa wanrah hapoh ka ïingdorbar thaw aiñ ia katei ka aiñ bad kawei na ki daw jong katei ka rai ha kane ka por ka long naka bynta ka ilekshon. Watla ka ilekshon sha ka ïingdorbar thaw aiñ kam pat jan bad kan long haduh u snem 2025, hynrei u Kishida uba la ioh bat ia ka bor synshar ha u Risaw jong u 2021, u la sdang ban pynpaw kam biang sa shi-sien pat ban pynkhlaiñ ia ka seng jong u bad ba kan ioh ban khur jingjop biang ha ka ilekshon ka ban wan.
Ha katei ka sngi, u Kishida u la pynbna ba u kyrmen ba un ioh ban pynkiew noh ia ka jingsiew ha ka liang ka ‘Child Care’ haduh 4.7 Trillion Yen ($33.7 Billion) bad la ngeit skhem ba kane kan treikam bad ba yn lah ban pyn-urlong noh hapoh jong u snem 2030.
Namarkata, ka sorkar Japan u la kyntu ia ki kompeni ha kylleng jong ka ri ba kin ailad ia kito ki nongtrei ba kin jied ia ki rukom treikam jongki kum ka ban shim shuti 3 sien shi taiew, naka bynta kito kiba don khun.
Watlakatta, la ong ba katei ka jingthmu jong ka sorkar kam lah ban pyn tikna ba yn lah ban tehlakam ia ka jinghiar palat ka jingkha khun hapoh ka ri.
Ka jingkha khun ka la hiar bha ha Japan naduh ki phew snem ba la leit bad kaba la ioh rekod thymmai ruh ia ka jinghiar palat ka jingkha khun ha u snem ba la leit.
