Doha, Jylliew:
Ka tyllong khubor kaba iajan bad u Sheikh Jassim Bin Hamad Al Thani ka iathuh mynta ba ki nongiathong na ka ri Qatar haduh mynta ki dang iai ap na ka bynta ban ioh ia ka jingpynshai ne ka jingbit na ka klob ialehkai phutbol kaba bha na London ka Manchester United, hadien ba ka kaiphod kaba lah mih ka ai jingmut ba kita ki nong-iathong na katei ka ri ki lah ban tyrwa mar pyrshah ia ka jingtyrwa ka jong ki ha ka jingiakhun na ka bynta ban ioh thied ia katei ka klob ialehkai ba pawbha ha ka pyrthei.
Kumba ka paw mynta ka long ba ka klob Man United ka lah pynbna ha u Naiwieng ba ka synjuk treikam ba ha khlieh duh jong ka klob ka lah pynpaw ia kawei pat ka lad ka lynti na ka bynta ban iai pynkhlain shuh shuh ia ka klob baroh kawei; kata da kaba tyrwa noh ia ka kaba long kawei na ki lad ki lynti ba ka lah jied hadien ba ka lah dep ban shong ia ka jingialang. Nalor kata, ki trai ba dang pyniaid haduh mynta ia ka klob kata ka ‘Glazer’s Family’, ka sngewthuh shai ruh mynta na ka bynta ban pynshongdor ia ka klob ialehkai hi baroh kawei shaduh ka 6 billion pound ($7.6 billion) bad ka Raine Group lah thied na ka bynta ban peit ban khmih bad pyniaid ia ki kam ki jam ha kaba iadei bad katei ka bynta.
Kumjuh ruh ka khubor ka iathuh ba u Sheikh Jassim u lah pynlong mynta ia ka jingiathong kaba san bad ba khatduh na ka bynta ka klob ha ka taiew ba lah dep bad lah sngewthuh shai ruh ba ka jingtyrwa ka jong u lah niew kum kawei na ki jingiathong kaba lah khring ia ki trai jong ka klob ban ia ka jingiathong kaba lah wan na u heh spah ka ri Bilat u Jim Ratcliffe. Ka kaiphod khubor ka iathuh ruh ba lada kata kaa jingiathong ba markhmat yn pdang ia ka bad ka ban leit ruh sha u Sheikh Jassim, khlem pep ka synjuk jong ka klob kan sa khang noh ia ka jingiathong jong u Ratcliffe katkum ka por ba lah buh jong ka jingiathong markhmat.
Hynrei kiwei pat ki khubor ki iathuh ba haduh mynta kam shym la don kano kano ka jingpynthymmai na ka liang jong u Sheikh Jassim bad kam shym la don ruh kano kano ka por ba lah pynbeit na ka bynta kiwei pat ki sienjam ba hadien. Ka jingtyrwa na ki heh saipan jong ka ri Qatar ka long ban thied pura ia ka klob baroh kawei kata da haduh 100%.
Shuh shuh ruh ka khubor ka iathuh ruh ba u Ratcliffe u kwah ban thied shalade ia ka jingpyniaid ha ka jingiasambynta ka ban long ruh ka lad ka lynti na ka bynta ka ‘Glazers Family’ ban dang iaisah ha ka jingiadonbyntalang ka jong ka bad katei ka sienjam khlem pep kan long ka bym pat da paw than ne jingkyrshan ha kaba iadei bad ki nongkyrshan jong ka klob.
Kawei pat ka Kompani kata ka Nine Two UK Holdings Limited, ka pynpaw ia ka jingdonbyntalang ka jong ka ha ri Bilat ia kaba lah sngewthuh shai ruh ba kan long kum shibynta jong ka jingpynkhreh u Sheikh Jassim lada ka jingiathong ka jong u ka long kaba seisoh bad ba jop. Katkum ki kot ki sla ba lah pynmih ha ka website jong ka Companies House, ka pynpaw ha ka thup kyrteng ia u Sheikh Jassim kum uba shimet u kyrtong ba biang tam eh ha ryngkat ka jinpyniaid ia ka kompani baroh kawei. Ka Companies House ka iathuh ruh ba baroh ki jingiasam ha ka kompani ba thymmai ka ri UK lah long trai da ka Nine Two Holdings LLC, ia kaba lah pynrung ia ka kytreng jong ka ha ka ri Qatar ha u bnai Iaiong mynta u snem.
Katba ka INEOS Chemical Company jong u Ratcliffe ka paw mynta kum ka nongiakhun kaba hakhmat na ka bynta ban khur ia ka jingjop ha ka jingiathong na ka bynta ban thied ia ka klob hadien ba ka kylla balai jong ka jingiathong lah khang noh ha ki tarik ba kham shadien jong u bnai Iaiong.
Kumba ka long mynta ha kaba iadei bad ka jingiaid lynti jong ka klob, ka long ba katei ka kynhun ialehkai ka lah pynkut noh ia ki hynriew snem jingsah shadien ka jong ka, da kaba khur ia ka jingjop ha ka League Cup ha u bnai Rymphang bad ruh kaba lah wan balai ha ka Premier League ha ka jingpyniaid ha ka sien kaba nyngkong jong u manager jong ka u Erik ten Hag.
