Ha u Nailar, yn pynsdang noh ïa ki klas ha ka Dental College, Agartala: Dr. Manik Saha

Agartala, Jylliew:

U Myntri Rangbah jong ka jylla Tripura, u Dr. Manik Saha ha ka 14 tarik mynta u bnai u la pynbna ba ïa ka Agartala Government Dental College kaba la tei ha IGM Hospital yn pynsdang trei kam noh naduh u snem pule (academic year) u ba mynta.

Ïa katei, u Myntri Rangbah u la pynbna paidbah hadien ka jingwan phai jong u na nongbah Delhi – bad ha katei ka sngi u la leit ruh ban jngoh ïa katei ka kolej kaba don ha ka nongbah Agartala.

Ha ka jingleit jngoh jong u Myntri Rangbah ïa katei ka kolej, na ka liang ka jong u u la pynpaw ïa ka jingsngewnguh kaba khraw ïa u Myntri Rangbahduh jong ka ri India – Narendra Modi u ba la wan ban plie maw nongrim. U la pyntip shuh shuh ba na ka liang ka Sorkar India lem bad ka Dental Council of India ki la dep ban ai ïa ka jingbit na ka bynta ban pynsdang ïa ki lad ai jinghikai ha katei ka kolej.

Ha ka jingïakren bad ki lad pathai khubor, na ka liang u Myntri Rangbah u la pyntip shuh shuh ba la dep ruh ban pynmih ïa ka ‘result’ jong ka NEET. U la pyntip shuh shuh ba watla ki la don katto katne ki jingpynkylla ha kaba ïadei bad ka jingpynsdang ïa ki klas, pynban na ka liang ka jong u ha ka jingleit jngoh ïa ka kolej u la shem ba la dep ban pynkhreh nadong shadong na ka bynta ban pynsdang ïa ki klas. U Myntri Rangbah u la pyntip shuh shuh ba na ka liang u secretary jong ka tnat Koit Khiah jong ka jylla lem bad kiwei kiwei ki heh sorkar ki la leit ban synran ïa u ha katei ka sngi – na ka bynta ban jngoh bad khmih lada katei ka kolej ka dang donkam sa ïa kiwei kiwei ki jait jingdonkam ba rit ba ria. U la pyntip shuh shuh ba na ka liang ka jong u lem bad ki bor sorkar ki la dep ban khmih bniah nadong shadong halor ki mat kiba ïadei bad ka jingpynkhreh na ka bynta ban pynsdang ïa ki klas.

U Myntri Rangbah u la pyntip shuh suh ba ki dang don katto katne ki kam barit baria kiba ïadei bad katei ka kolej bad na ka liang ka jong u, u la dep ban bthah ïa ki bor ba dei peit ba kin khmih bniah bad pyndep ïa ki kam ba sah.

U la pynpaw ïa ka jingkyrmen kaba khraw ba ïa ki klas ha katei ka kolej yn sa lah ban pynsdang noh ha u Nailar jong une u snem ba mynta.