Bhubaneswar, Jylliew:
Da kaba wanphai biang mynta sha ka kam ialehkai hadien kumba saw snem namar ka jingshitom bad mynsaw ba ka Anjali Devi ka lah mad, ka khubor ka iathuh ba katei ka nongialehkai mynta ka kynti ka lah ioh ban pynjanai shuh shuh ia ka rekod ha ka por ialehkai ka jong ka na ka bynta ban khur ia ka nam jop ha ka jingiakob mareh 400m ha ryngkat bad ka takma Ksiar ba ka lah ioh ban khur na ka National Inter-State Championships bad kaba lah pynthikna ruh halade ia ka jingioh jaka ha ka Asian Games ka ban sa long.
Ka khubor ka iathuh ruh ba ka Anjali kaba lah mareh khatduh ha ka 400m ha u Risaw 2019 ha ka Indian Open Championships ha Ranchi, ha ka jingiakhun ba mynta ha katei ka lympung ialehkai, ka la lah ban pyndep ha ka por 51.58 sekhon na ka bynta ban pynliem noh ia ka nongiakhun pyrshah ka Haimashi Malik (51.76s) na ka bynta ka jingiaknieh ia katei ka takma Ksiar ha ka lympung. Kumta ruh ka Haimashi, R Vithya Ramraj (52.49s) bad kaba lah wan ba saw ka Aishwarya Kailash Mishra (52.79s) ki long ki thei ialehkai kiba lah mareh hapoh jong ka por ban shah jied sha ka Asian Games. Hynrei tang ar na ki saw ngut ki nongialehkai kin shah jied naba ka ri India baroh kawei kan lah ban phah la kumno kumno haduh arngut ki nongshimbynta ha kawei ka rynsan ialehkai.
Ha ka jingiakob 400m ki shynrang, u nongialehkai na Sri Lanka u Kalinga Kumarage u lah rah ia ka takma Ksiar hadien ka jinglah ban pyndep ia ka por ialehkai sha ka 45.64sekhon, katba u nongbat ia ka rekod ha ka ri u Muhammed Anas Yahiya u lah khur ia ka takma Rupa da kaba pyndep ha ka por 45.76s. Kumjuh ruh u Muhammed Ajmal, bad u Amoj Jacob ki long ki nongialehkai kiba lah wan ha ka kyrdan balai bad ba saw da kaba pyndep ha ka por 45.90sekhon bad 45.91sekhon.
Kumta kitei ki saw ngut ki lah nang iai pynjanai shuh shuh ia ka por shah jied sha ka Asian Games kaba da 46.17sekhon. kumjuh ruh u B Shiva Kumar na Tamil Nadu u lah paw kum u nongmareh ba paw hakhmat eh da kaba pyndep ha ka por 10.37sekhon na ka bynta ban khur ia ka takma Ksiar ha ka 100m. Ka Jyothi Yarraji na ka long ka thei ialehkai ba sted mareh da kaba pyndep ha ka por 11.46s na ka bynta ban khur ia ka takma Ksiar ha ka 100m.
