Guwahati, Jylliew:
U Dilip Kumar Jaiswal, u nongïalam jong ka seng BJP u ba dei ruh u dkhot jong ka Bihar Legislative Council ha ki khyndiat sngi kiba la leit noh u la pyntip ba ki don haduh 17 ngut ki ophisar rangbah jong ka Sorkar Nagaland kiba dang hapoh ka jingshah tohkit ha ka Enforcement Directorate (ED).
Haba ïakren bad ki lad pathai khubor, na ka liang u Jaiswal u ba dei ruh u chief whip jong ka BJP bad kumjuh ruh u nongpeit pyrman jong ka seng BJP ha Sikkim, u la pyntip ba na ka liang ka Sorkar Pdeng ka la ïoh ban lum lum jingtip shaphang ki bam sap kiba jyllei ha ka jylla Nagalanbd.
U Jaiswal u la pyntip shuh shuh ba na ka liang ki briew jong ka ED ki la pynkhreh ban pynrung da ka mokotduma pyrshah ïa ki heh sorkar kiba donkti ha ki kam bam sap, bad shen kitei ki heh sorkar kin hap hapoh ka jingshah pynshitom kaba tyngeh.
Na ka liang u Jaiswal u la pyntip shuh shuh ba watla na ka liang ka seng BJP ka la don bynta ha ka sorkar synrop jong ka jylla Nagaland, pynban ki kam bam sap ki dang kynrei bad katei ka la wanrah ïa ka jingbudnam kaba jur na ka bynta ka jylla Nagaland. U la ïathuh shuh shuh ba na ka jingjyllei jong ki kam bam sap, ka la wanrah ruh ïa ka jingktah kaba jur ha ka liang ka roi ka par bad ka ïoh ka kot jong ka juylla Nagaland. U la ong ba lymda dei na ka jingjur jong ki kam bam sap, ka jylla Nagaland ka jin da dei ka jylla kaba roi tam ha India. Na ka liang u Jaiswal u la ïawer ïa ki nongshong shnong jong ka jylla Nagaland kynthup ïa ki nongtrei kam sorkar ba kin ïeng tylli lang kawei na ka bynta ban rat dyngkhong ïa ki kam bam sap na ka jylla. U Jaiswal u la ai jingkren ruh halor ki mat kiba ïadei bad ki kam bam sap kiba kynrei ha ka por ba ka jylla Nagaland ka dang hap hapoh ka jingsynshar jong ka seng Congress – bad u la ong ba ha ki 60 snem kiba la leit noh, ki kam bam sap ki dang ïai suhthied ha ki heh sorkar jong ka jylla.
Haba ïadei bad ki mat trei kam jong ka seng BJP ha ka jylla Nagaland, na ka liang u Jaiswal u la ong ba ka seng ka la shim ïa ki lad ki lynti kiba kyrpang ban pynurlong ïa ki kular kiba ka la khlei hashwa ka ilekshon.
