Karachi, Jylliew:
Na ka liang jong ka Pakistan Cricket Board (PCB) ha ka jingpyllait khubor ka iathuh ba ka lah jied ia ka kyrteng jong u rangkawang bol (pace) ka kynhun u Shaheen Afridi na ka bynta ka jingialehkai Test ka ban sa long ha u bnai ban wan ha Sri Lanka, katba u Muhammad Huraira bad Aamir Jamal ki long kiwei pat ki rangialehkai kiba lah shah khot biang mynta ha ka sien kaba lai sha ka kynhun na ka bynta katei ka jingiakhun.
Na ka liang jong ka PCB ka pynbna ruh ba u rangkawangbol barim ka South Africa u Morne Morkel u lah shah jied mynta kum u nonpyniaid jong ka kynhun kawangbol, ha kaba un sa sdang ban pyntyllun ia ka kam ai jinghikai ka jong u sha ka kynhun hadien ba u lah dep ban soi ia ka jingiateh kontrak ba hynriew bnai. Shuh shuh ruh ka khubor ka iathuh ba kata ka kynhun ialehkai ba 16 ngut jong ka Pakistan ka ban hap hapoh ka jingialam jong u Babar Azam, kan pynkhreh na ka bynta ban ialehkai ar tylli ki jingialehkai Test ha Sri Lanka ka ban long ruh ka jingsdang ka jingiaid lynti jong katei ka kynhun ialehkai ha ka shalyntem kaba lai jong ka ICC World Test Championship.
Ka khubor kaba lah pynsngewbha ia katei ka kynhun ialehkai ka long ka jingwanphai biang mynta u snar kawangbol pace ka kynhun u Afridi u bym shym la ialehkai shuh ha kano kano ka jingialehkai Test naduh u Naitung jong u snem ba lah dep na ka daw jong ka jingmynsaw ka khohsiew.
Kumjuh ruh u Shaheen, uba lah mad ia katei kajuh ka jingmynsaw ha ka jingialehkai ba khatduh ha ka jingialehkai Test, mynta u lah shah kynthup ha ka kynhun ka ban leit Sri Lanka ha u bnai Naitung bad ha kaba khatduh eh u lah shimbynta bad ka kynhun ha ka jingialehkai T20 World Cup phainal ha ka jingiakhun pyrshah bad ka England u ha u bnai Risaw.
Ka kynhun ialehkai jong ka Pakistan na ka bynta ka jingleit sha Sri Lanka ka kynthup:
Babar Azam (C), Mohammad Rizwan (vc & wk), Aamir Jamal, Abdullah Shafique, Abrar Ahmed, Hasan Ali, Imam-ul-Haq, Mohammad Huraira, Mohammad Nawaz, Naseem Shah, Noman Ali, Salman Ali Agha, Sarfaraz Ahmed (wk), Saud Shakeel, Shaheen Afridi bad Shan Masood.
