Shillong, Jylliew 18:
Ka Scotland, Portugal ki la khur ïa ka jingjop katba ka Belgium ka la ïakhaid noh ha ka jingïakhun pyrshah ïa ka Austria ha ka lympung ïaknieh rung sha ka Euro 2024.
Haba phai sha ka jingïalehkai, ka Scotland ka la khur ïa ka jingjop kaba khraw bha naba ka la ïoh ban khyrwit haduh ar tylli ki kol ha shwa ban wai ka jingïalehkai ban lah pynliem noh ïa ka Norway da 2-1 kol.
Ha kane ka jingïaleh kai, ka Norway ka la ïoh ban khyrwit ïa ka kol kaba nyngkong ha ka minit kaba 53 lyngba u Erling Haaland da penalty. Kane ka kol kan i ruh kumba kan dei ka kol ban ïalam lynti ïa ka Norway sha ka jingjop bad ruh ban buh jingkyrmen ha ka Group-A, hynrei ki ar tylli ki kol ba la khyrwit da u Lyndon Dykes bad Kenny McLean ha ka minit ba 87 bad 89 ka la biang pura ïa ka Scotland ban sdang ha ka rukom kaba paka ha kane ka jingïaknieh rung Euro 2024 bad ban pynshaïong hi ngaiñ ïa ka Norway ha ka jingïalehkai kaba la long ha Oslo.
Kane ka jingjop, ka la pynlong ïa ka Scotland ban don hakhlieh duh ha ka Group-A, kata hadien ba ka la khur 9 point na ki 3 tylli ki jingïaleh -kai katba ka Norway pat ka dang khur tang 1 point na ki 3 tylli ki jingïalehkai bad don ha ka kyrdan kaba 4.
Mynta ka Scotland kan pyn-khreh ban ïakhun pyrshah ïa ka Georgia ha ka sngi Ba-ar ha Hampden, ha kaba ka jingjop kan buh jingkyrmen ba kan rung biang sha kane ka lympung.
Ha kawei pat ka jingïalehkai, u Cristiano Ronaldo u la jop ïa ka jingïalehkai kaba 199 ka jong u na ka bynta ka Portugal, kaba la lah ban pynliem noh ïa ka Bosnia-Herzegovina da 3-0 kol bad ban dang pynneh ruh ka jingjop, kata ban jop baroh 3 tylli ki jingïakhun bad kamai 9 point.
Haba phai sha ka jingïalehkai, ïa ka kol ba nyngkong la thep da u Bernardo Silva ha ka minit kaba 44 bad u Bruno Fernandes pat u la khyrwit ar tylli ki kol, ha ka minit ba 77 bad 90+.
U Ronaldo u la ïoh ban khyrwit kol ha ka kylla step, hynrei khlem shym la ñiew satia namar ka jingshah rai ‘offside’ ha u referee, ha ka jingïalehkai kaba la long ha Estadio da Luz.
Kumba ka long mynta, Portugal ka dang don hakhlieh duh jong ka Group-J hadien ba ka la jop lut baroh ki jingïalehkai. Katba ka Bosnia-Herzegovina ka don ha ka kyrdan kaba saw na ki 3 point na ki 3 tylli ki jingïalehkai.
Katba ka jingïalehkai hapdeng ka Belgium pyr shah ïa ka Austria kaba la long ha Brussels ka la kut noh ha ka jingïa-khaid da mar shi kol. Ka kol ba la ïoh ban thep da u Romelu Lukaku ha ka kylla miet, ka la ïarap ïa ka Belgium ban ïoh khur shi point ha ka jingïa-knieh rung sha ka lympung Euro 2024.
Ha kane ka jingïalehkai, ka Austria lyngba u Michael Gregori-tsch ha ka minit ba 21 ka la ïoh thep nyngkong, hynrei kam shym la lah ban khanglad ïa ka Belgium bad ha kaba kut ban ïasam mar shi point.
Kumba long mynta ka Austria ka don ha ka kyrdan ba nyngkong ha ka Group-F hadien ba ka la khur 7 point na ki 3 tylli ki jingïalehkai, katba ka Belgium ka don ha ka kyrdan kaba ar na ki 4 point ba ka la ïoh na ki 2 tylli ki jingïalehkai.
Mynta ka Belgium kan pynkhreh ban ïakhun pyrshah ïa ka Estonia ha ka sngi Ba-ar katba ka Austria pat kan ïakhun pyrshah ïa ka Sweden ha kane kajuh ka sngi.
