Shillong, Jylliew 18:
Ka Randajied United Football Club (RUFC) ka la rah ïa ka nam lahduh jong ka lympung Meghalaya State League 2023 hadien ba ka lah pynliem noh ïa ka Khliehmawlieh Youth Club da 1-0 kol ha ka final kaba la long ha ka sngi Saitjaiñ ha madan SSA Stadium, Polo.
Kane ka shi kol jong ka jingïalehkai ka la wan ha ka minit ba 9 ba la ïoh ban khyrwit da u Wanlamsuk Nongkhlaw hapdeng ka jingsakhi jong ki paid nongkyrshan kiba la pyndap smam hapoh ka stadium.
Ka jingïakhun hapdeng ka Rangdajied United pyrshah ïa ka Khliehmawlieh ka la long ka jingïakhun kaba itynnad bha ha kaba ki rangïalehkai na baroh arliang ki la sei la ka buit ka bor bad ka sap ka phong ban ïakhun tyngeh ban ïoh rah ïa ka nam lahduh jong kane ka lympung.
Ïa kane ka jingïalehkai final la wan ban sakhi da u Symbud Myntri Rangbah ka jylla u Bah Sniawbhalang Dhar, u Nongaibuit jong u Myntri Rangbah ka jylla, Bah Hamletson Dohling, u Additional Chief Secretary, Dr P Shakil Ahammed, ka Deputy Commissioner ka East Khasi Hills, Kong RM Kurbah, ka Secretary ka tnat Sports and Youth Affairs Kong R Sohkhlet, u MLA barim bad u nong-ialehkai barim jong ka India u Bah Eugeneson Lyngdoh, ki nongïalam bad dkhot ka Meghalaya Football Association nalor kiwei kiwei.
Haba phai sha ka jingïalehkai, ka Khliehmawlieh wat la ka la shah thep shi kol mar ïa sdang, hynrei kam shym la duh jingkyrmen. Ka la ïakhun tyngeh tangba wat la ka la ïoh ïa ki katto katne ki kabu kam shym la lah pat ban pynkhih jar naba ki rangïalehkai shadien jong ka Rangdajied United ki la lah ban kyrshan tyngeh ïa ka bynta ba shadien ban nym ailad ïa ki rangïalehkai shakhmat ka Khliehmawlieh ban ïoh lad pynkhih jar.
Ha ka por ba la kut ka kylla step, la sam ïa ka ‘Cheque’ kaba T.2 lak sha baroh ki Association kiba pynïasoh bad ka MFA ha kaban pynlong ïa ka jingïalehkai phutbol ha ki thaiñ jong ki bad kane ka dei kum shi bynta jong ka jingshimkhia ka MFA bad ka sorkar jylla ban pynbiang ïa ki jaka ïalehkai ha baroh ki district jong ka jylla.
Ka Rangdajied United kaba la rah ïa ka nam lahduh jong kane ka lympung, ka la khur ïa ka song khusnam kaba long T.5 lak bad ka trophy, katba ka Khliehmawlieh ka la khur T.3 lak bad ka trophy.
Nalor kane, la sam ruh ïa ka song kaba long T.1 lak sha baroh ki club kiba la ïashim bynta ha kane ka lympung, katba kito kiba la rung sha ka semi-final ki la ïoh sa mar T.1 lak.
Haba phai pat sha ki khusnam shimet jong kane ka lympung, u Donlad Diengdoh jong ka Mawlai Sports Club u la khur ïa ka khusnam ‘Golden Boot’ hadien ba u la ïoh khyrwit haduh 15 kol, arngut ki rangïalehkai ka Rangdajied kiba kynthup ïa u Banshanlang Sten u la ïoh ïa ka khusnam ‘Golden Glove’ kum u nongapkol ba tbit tam bad u Tremiki Lamurong u la ïoh ïa ka khusnam Golden Ball ne u nongïalehkai uba kynsai tam ha ka MSL.
U Bah Sniawbhalang Dhar u la shim ïa ka bynta ba kongsan ban aiti ïa ki khusnam jong ka MSL ha ka RUFC kaba la long ka lahduh ha ka lympung ïalehkai phutbol.
