Shillong, Jylliew 18:
Ka Umphyrnai Sports Club, Rangdajied United Football Club bad ka PFR Academy ki la khur ïa ki jingjop ha ki jingïakhun ki jong ki, ha ka lympung SSA Under-14 ( Boys) Football League 2023 ba la pynïaid da ka Shillong Sports Association ha madan Polo.
Haba phai sha ki jingïalehkai ba la pynlong ha ka sngi Saitjaiñ ha madan 3rd Ground (MFA Turf), kata ha ka jingïalehkai kaba nyngkong kaba la long ha ka por 11 baje mynstep, ka Umphyrnai SC ka la lah ban pynliem noh ïa ka Mawlai Sports Club da 2-1 kol. Ïa ki kol jong ka Umphyrnai la ïoh ban thep da u Baniar Kharjanoh ha ka minit ba 28 bad 50.
Ha ka jingïalehkai kaba ar, kaba la long ha ka por 12.30 mynsngi, ka Rangdajied United FC ka la lah ban pynliem noh ïa ka Mawpat Sports Club da 3-0 kol bad ïa kine ki kol ka Rangdajied la ïoh ban thep da u Roderick Khongjee ha ka minit ba 12 bad 58 bad u Steward Nongkynrih ha ka minit ba 30.
Ha ka jingïalehkai kaba khatduh pat kaba la long ha ka por 4.15 janmiet, ka PFR Academy ka la lah ban jop kput ïa ka 4th Mile Kick Start Football Team Academy, kata ban khyrwit haduh 16-0 kol.
