Kitdor H.Blah
Te ka O.M. ba thymmai thalor ka Roster system ka lah mih. Kane ka O.M. No.PER(AR)25/2022/Pt/23 tarik 14.06.2023 kan pyndam noh ia ka O.M.No. PER (AR)25/2022/Pt/3 tarik 10.05.2022. Te kaei ka jingkylla halor ka Roster system katkum kane ka O.M. bathymmai?
Te ban sngewthuh ia kane, nga kwah ngin peit shwa ia ka Roster kaba rim, bad balei ka long ka bym biang:
1.Ka O.M. barim tarik 10.05.2022 ka la plie lad ia ka Compensatory method. Ngan nym khot hi ruh ia ka da ka Retrospective, namar ym don eiei ha ka Reservation Policy ne ha ka jingbthah ka Iingkashari shaphang ka Retrospective method. Ka sorkar MDA ka lah leh hi da ka bor lajong ban pyniadep ne compensate ia ki post kiba rim kiba khlem lah ban pyndap da ki Garo, bad kane kadei ka bym lah ban pdiang. Te balei lane kumno kato ka O.M. barim ka la ailad ban leh kumne?
Ka Reservation Policy, katkum ka Resolution tarik 12.01.1972, ha ka para 2, ka kren shai ba lada ym lah ban thep ia ki post kiba la bhah na bynta kano kano ka kynhun, da kita kiba la bhah ia ki, yn lah ban thep ia kita ki post da kiwei pat, bad ia kata ka jingduna yn rah sha ka snem thep kam kaba bud, bad lada ym lah ban thep sa ha kata ka por, te yn khein iadep noh, bad ia kata ka jingduna yn khein duh noh. Hynrei kane ka O.M tarik 10.05.2022, ka la plie lad ban pyniadep naduh u snem 1972, ia ki post ki bym lah ban thep da ki Garo, bad kane ka dei namar jong ka 100 point Roster kaba ki la wanrah bad ruh lyngba artylli ki clause ha kane ka O. M. tarik 10.05.2022, kata ka clause B(6) bad ka clause D(2), kiba ong kumne:
B (6) : After every recruitment cycle, an account shall be noted in the reservation roster indicating representation of Khasi and Jaintia, Garo, Other STs & SCs and details of backlog reserved vacancies, which will be carried forward to the next recruitment cycle.
D(2): If an appointee belonging to a Scheduled Tribe category was appointed on his/her own merit, UR will be written in column 5. If an appointee belonging to a Scheduled Tribe category was appointed on reservation, ST will be written in column 5. If an appointee belonging to an OST/OSC category was appointed on reservation, OST/OSC will be written in column 5. After making entries as indicated above, details about the number of ST and OSTs/OSCs candidates appointed by reservation, backlog reserved vacancies, if any, may be indicated in Remarks column.
Te kine ki ar tylli ki clause B(6) bad D(2), lem bad kane ka 100 point Roster, kyllum lang, ki la plie lad ban wanrah ia kata ka jingpyniadep ne compensatory method, kaba khlem don ha ka Reservation Policy bad kaba long pyrshah ia ka para 2 jong ka. Ki kyntien ha ka clause B(6) bad ka clause D(2) kiba la ailad ban leh kumne kidei kiba kren shaphang ki “backlog reserved vacancies” bad kata ka “recruitment cycle” jong ka 100 point roster, kaba mut ka cycle lane ka jingtyllun jong kita ki 100 point. Te sa shisien, ngan ban biang ba kine ki “backlog reserved vacancies” bad kane ka “recruitment cycle” kim don bynta ha ka Reservation Policy, hynrei la wanrah iaki lyngba kane ka O. M. tarik 10.05.2022. Hooid, ka don ka kynja backlog ha ka Reservation Policy, kaba dei ia kaba rah ia ka jingduna sha ka shi snem thep kam kaba bud (next recruitment year), hynrei ka kut noh hangta, lada lah ne ym lah ban pyndap ia ka jingduna. Kam rah shakhmat katkum ka cycle jong 100 point Roster. Na ka bynta ka jingmut jong ka Recruitment Year, nga kyrpad ia ki nongpule bad leit shaka “DoPT Brochure on Reservation for Scheduled Castes & Scheduled Tribes,” Chapter 11, “Carrying forward of Reservations,” para 11.1. Hangne, ka kren shai ba ka snem thep kam lane “Recruitment Year” kan dei kata ka “Calendar Year” ha kaba ka don ka jingthepkam, kaba mut ba kan dei ka por naduh u 1tarik u Kyllalyngkot/ January haduh 31 tarik u Nohprah / December, jong uno uno u snem ha kaba la don ka jingthepkam. Bad kan ym lah ban tam ia ka shi calendar year. Te kane ka jingmut jong ka shi Recruitment Year haka Reservation Policy ka iapher bak-ly-bak na kata ka Recruitment cycle jong kata ka 100 point Roster, katkum ka O.M. tarik 10.05.2022.
2.Ka O.M. barim tarik 10.05.2022, kam shim ne buh jingkhein pat ia ka bhah jong ki post kiba lah dep thep haki por ba la dep. Hangne ngin hap kren shaphang ka rai jong ka Supreme Court, haka case “R. K. Sabharwal vs. State of Punjab” bad ka ruh ka case “J. C. Mallick vs Ministry of Railways.” Ka Supreme Court, ha kine ki case ka la rai ba “reservation of jobs for the backward classes SC/ST/OBC should apply to posts and not to vacancies.” Kaba mut ba ka bhah kam, kam thew tang ia ka jinglait kam, hynrei ka thew ruh ia ki kam ne ki post kiba la dep thep. Kaba mut ba lada la dep thep ia ka kam da ki briew na kano kano ka kynhun, lyngba ka bhah jong kata ka kynhun, kata ka kam kan iai long ka bhah jong kata ka kynhun, wat ynda ka lait biang hadien lyngba ka jingshongthait noh, ne jingiehnoh kam noh, ne jingkiew kyrdan noh jong kita kiba lah bat ia kata ka kam. Te ynda ka la lait biang kata ka kam, kan iai long beit ka bhah jong kata ka kynhun, bad hap thep ia ka ruh da ki briew na kata ka kynhun hi. Te kumne, kata ka kynhun kan ym duh noh ia ka bhah jong kino kino ki kam ne ki post kiba lah dep bhah ia ka por ba pynrungkam.
Hynrei kane ka O.M. tarik 10.05.2022, kam shim buh jingkhein ia kata ka bhah jong ki kam ba la dep thep, ne shim jingmut na kane ka rai jong ka Supreme Court. Ka long kaba lyngngoh ba ka sorkar ka khlem shim ia kane ka jingkhein, namar ka Order jong ka Meghalaya High Court, tarik 05.04.2022, kaba la bthah ban shna iaka Roster, ka lah pashat jingmut ruh sha kane ka case ba nga la kdew haneng, “R. K. Sabharwal vs. State of Punjab,” ha kaba ka Supreme Court ka la rai ba ka bhah kam ka thew ruh sha ki kam ne ki post, ym tang sha ka jinglait kam.
3.Ka O.M. barim tarik 10.05.2022, kam shai halor ka jingmut jong ka kyntien “Cadre Strength.” Bad ha ka jingkhmih bniah jong une u nongthoh, kane ka dei ka tynrai jong ki jongkulmar baroh. Na kane ka daw, lada phi pule ia kane ka O.M. bad lada pyntreikam ia ka Reservation katkum kane ka O.M., ngin nym lah ban sngewthuh shuh ia ka para 3 jong ka Reservation Policy. Kane ka para 3 jong ka Resolution tarik 12.01.1972 ka kren ba ha kawei ka Recruitment Year, ne snem thep kam, lada ym lah ban pynrung kam na kano kano ka kynhun kaba ioh ia ka jingbhah kam, namar ba ka bynta ba kata ka kynhun kan ioh na ka jinglaitkam jong uta u snem ka long duna ia ka 0.5, te yn khein beit noh 1 bynta, lada ka bynta ka lah kot hi 0.4. Te lehse, ki nongpule hangne kin sngew kulmar haba ki pule shaphang kane ka bynta/fraction 0.5 lane 0.4. Te ban pynsuk, to shim ia kane ka nuksa. Lada lait 100 tylli ki kam, bad ka jingbhah ka iaid kumba ka long mynta, ka mut ka jingbhah kam kan long kumne – Khasi 40, Garo 40, UR 15, Other 5. Kamut na ka 100 tylli, ka jingioh bynta ka long 40, 40, 15 bad 5. Te ka lah ban long pat ba ha kawei ka snem, ka jinglait kam ka duna bha, lehse tang hapoh 8 tylli ne hapoh 10 tylli, bad ka bynta jong kawei na kine ki kynhun kan ym kot tang 1 ruh, hynrei kan poi tang 0.5 ne 0.4. Te ka para 3 jong ka Reservation Policy ka ong ba kum ha kata ka khep, ia kane ka bynta 0.4, yn khein beit noh kum 1 bynta, khnang ba kata ka kynhun ka nym duna ka jingioh bynta.
Te hynrei, kane ka jingkhein bad kane ka para 3 jong ka Resolution kam ioh jaka shuh lada ngi pyntreikam ia ka Reservation katkum kane ka O.M.tarik 10.05.2022. Bad ka tynrai ka long ka jingkulmar halor ka jingmut jong ka kyntien cadre lane cadre strength, ha kaba iadei bad ka Reservation. Te, na ka bynta ka jingmut jong ka Cadre Strength ne Cadre, ha kaba iadei bad ka Reservation, nga kyrpad ia ki nongpule bad leit sha ka “Brochure of Reservation” jong ka Dept. of Public Enterprise, Chapter 4, para 4.2. Hangne ka batai shai ba ka “cadre” lane “cadre strength” ha kaba iadei bad ka Reservation, ka thew ia ka jingdon ki post ne ki kam kiba dei ban thep ha ka shi snem, bad kam thew ia ki post ne ki kam kiba la dep thep ha ki por ba la dep. Te kumta, ka Cadre Strength kan iapher na uwei u snem sha uwei pat. Bad ia ka bhah thungkam dei ban khein katkum kane ka Cadre Strength, lane katno tylli ki post ki don ban hap thep ha ka shi snem. Hynrei katkum kane ka O.M. tarik 10.05.2022, bad ka 100 point Roster, kam shai ia ka jingmut jong kane ka kyntien Cadre Strength, na kata ka kaw, ka lah pyntreikam ia ka bhah katkum ka jongdon ki post salonsar, naduh ki por ba la dep haduh mynta, wat naduh u snem 1972 ruh. Kumba nga la thoh haneng, kane ka dei ka tynrai jong ki jingklumar baroh.
Te lyngba kine ki 3 tylli ki mat, u nongthoh u pyrshang ban pyni ia ka jingbymbiang jong ka O.M. tarik 10.05.2022 bad ka Roster jong ka. Te hynrei mynta ka O.M. ba thymmai ka la mih, tarik 14.06.2022. Nga iohi ki don 7 tylli ki jingpynkylla ha kane ka O.M. ba thymmai. Ki artylli kiba kham kongsan kidei ki jingpynkylla ia kitei i clause ba la kdew haneng, ka clause B(6) bad ka clause D(2), ha kaba la weng noh ia ka jingkren shaphang ki “backlog reserved vacancies” bad ka “recruitment cycle.” Kine ki jingpynkylla, i kumba ki lah weng noh iaka jingpyniadep lane compensatory method. Kane kadei kaba donkam eh, ban nym don ka jingiatyngkhuh hapdeng ka O.M. ba mynta bad ka para 2 jong ka Resolution tarik 12.01.1972. Hynrei iaki jingduna jong ka O.M. tarik 10.05.2022, katkum ki mat 2 bad 3 ba u nongthoh u la pyni haneng, kane ka O.M. tarik 14.06.2023, kam pat lah ban pynbeit. Te kumta ka dang duna bha. Bad ka jingbym shai halor ka jingmut jong ka Cadre Strength ka long ba kane ka O.M. ba thymmai ruh kan dang iaid hi katkum ka Compensatory method, namar wat lada lah weng ia ki kyntien kiba kren shaphang ki “backlog reserved vacancies” bad ka “recruitment cycle,” naka clause B (6) bad ka clause D (2), namar khlem ka jingsngewthuh shai ia kane ka Cadre Strength, yn pyntreikam iaka bhah ym ia ki post ne ki kam kiba lait haka shi snem, hynrei ia ka jingdon jong ki kam, naduh ka mynnor, haduh ka mynta, ha kano kano ka por ruh, nangne shakhmat. bad ka jingbym lah jong ka ban shim jingkhein katkum ka mat ba 2 ba la pyni haneng, kan don ka jingduhnong na ka jingduh noh wai ia ki post ne ki kam, kiba lah thep ha ki por ba lah dep, katkum ka bhah jong kano kano ka kynhun.
