Jowai, Jylliew 18:
U Pynskhem Mukhim u la ïoh ban khyrwit ïa ka hat-trick kaba la pynlong ïa ka Da-i-hi Sports Club ban pynliem noh ïa ka Nangbah Pohchnong da 6-1 kol ha ka lympung ïalehkai 3rd Division Football Tournament-3rd Adelbert Memorial Trophy.
Ïa kane ka lympung ïalehkai la pynïaid da ka West Jaiñtia District Sports Association ha madan Kiang Nangbah Stadium, Ladthadlaboh Jowai ha ka sngi Saitjaiñ.
Haba phai sha katei ka jingïa-lehkai, kaba dei ruh ka jingïalehkai ba khatduh jong kane ka sngi, ka la long kaba khlaiñ shiliang naba ka Da-i-hi SC kan jop syndon haduh 6-1 kol ïa ka Nangbah Pohchnong.
Ki nongthep kol jong ka Da-i-hi Sports Club ki long u Pyndap Pyrtuh uba la thep ha ka minit kaba 31 bad 52, u Pynskhem Mukhim ha ka minit kaba 33, 37 bad 40 bad u Wanbok Dhar ha ka minit kaba 48. Katba ïa ka shi kol jong ka Nangbah Pohchnong la thep da u Riyo Dhar ha ka minit kaba 12.
Haba phai sha ka jingïakhun ba nyngkong, ka Madankynsaw Moo-kyndeng ka la pynliem ïa ka Pasyih Youth Cultural da 2-1 kol. Ïa ki kol ka Madankynsaw Mookyndeng la thep da u Dangri Phawa ha ka minit ba 18 bad 67. Katba ïa ka shi kol ka Pasyih Youth Cultural la thep da u Ianeh Phawa ha ka minit kaba 49.
Ha ka jingïalehkai kaba bud, ka jingïakhun hapdeng ka Mukhla Umlangshor pyrshah ïa ka Lum-chyrmang Mihmyntdu ka la kut noh ha ka jingïakhaid khlem da don kiba ïoh ban pynkhih jar haduh kaba kut bad ban shu hun noh ka ïa sam mar shi point.
