Aizawl, Jylliew:
Ki nongïalam ka Young Mizo Association (YMA) ha ki khyndiat sngi kiba la leit noh ki la pyntip ba ki don katto katne ngut ki nong Myanmar kiba la wan rieh tngen ha ka thaiñ Kolasib District, hynrei ki bym don pat ïa ki kot ki sla ba donkam kum ka Aadhar card, PAN card bad kumjuh ruh ki bank passbook.
Halor katei, na ka liang ki dkhot jong ka YMA na ka thaiñ Awithangpa ha ki khyndiat sngi ki la leit ruh ban jurip bad khmih bniah ïa ki 110 ngut ki nong Myanmar kiba sah mynta ha ka shnong Khamrang, Kolasib District bad ha katei ka jingleit jurip ka jong ki, ki la lap ba ki don 3 ngut ki nong Myanmar kiba don ïa ki Aadhar card, ka passbook jong ka Federal Bank (Aizawl), bad kumjuh ruh ka PAN Card.
Na ka liang ki nongïalam jong ka seng ki la pyntip ba hadien katei ka jinglap, na ka liang ka jong ki la phah ruh ïa ki ‘photocopy’ jong kitei ki kot ki sla ba donkam sha u DC ka Kolasib District – John LT Sanga na ka bynta ki kam tohkit kiba sah.
Na ka liang ki nongïalam jong ka YMA ki la pyntip shuh shuh ba ïa kitei ki kot ki slab a donkam la shon thok/beaiñ ha kawei ka dukan shon kot kaba don ha ka nongbah Aizawl. Ki nongïalam ka YMA ki la pyntip shuh shuh ba kitei ki nong Myanmar ki la siew T.8,000 na ka bynta kawei ka Aadhar Card.
Halor katei ka jingjia, na ka liang ki nongïalam jong ka YMA ki la kyntu ïa u DC ba u dei ban pynlong da ka jingtohkit kaba bniah halor katei ka jingjia bad kumjuh ruh ban shim da ki sienjam kiba tyngeh ïa ki briew kiba la donkti ban shon thok ïa kitei ki kot ki sal.
Haba phai sha kawei ka khubor, la ïathuh ba na ka liang u DC ka thaiñ u la pyntip ba ka jingdon ïa ki kot ki sla ba shon thok da ki bar ri ka dei kawei na ki kam beaiñ kaba jwat – kaba dei ban tohkit bniah da ka tnat pulit jong ka jylla.
Ha kawei ka liang la ïathuh ruh ba uwei u heh shipai ka Assam Rifles (bym shym la pynpaw kyrteng) u la pyntip ba ki don bun ngut ki nong Myanmar bad Bangladesh kiba la wan ban rieh tngen ha ka jylla Mizoram, hynrei kiba don pat ïa ki kot ki sla ba la shu shon tuh. U la pyntip ba ïa katei la lap hadien ba ka tnat shipai ka la leit ban pynlong ïa ki jingtalasi.
Kum ban shu ïathuh hangne la ong ba tad haduh kane ka kynti kaba mynta ki don haduh kumba 34,000 ngut ki paid Myanmar bad kumba 700 ngut ki paid Bangladesh kiba la wan ban rieh tngen ha ka jylla Mizoram. Ki paid Chin na ka ri Myanmar bad ki paid Kuki-Chin na ka ri Bangladesh ki don ïa ka jingïadei kaba ïajan bha bad ki paid Mizo jong ka jylla Mizoram.
Ka jylla Mizoram ka don ïa 510 km ka lynter khappud bad ka ri Myanmar bad 318 km ka lynter khappud bad ka ri Bangladesh.
