Shillong, Jylliew 18:
Ka Meghalaya Football Association (MFA) ha ka sngi pynhap pyrda ïa ka lympung Meghalaya State League 2023 ha ka sngi Saitjaiñ, ka la ïoh ban sam ïa ka ‘cheque’ ba mar T.2 lak sha baroh ki District Sports Associations (DSA) kiba ïateh lok bad ka Meghalaya Football Association.
Kane ka jingsam pisa kaba T.2 lak ka long ruh kum ka dak ban ai ka jingithuh ïa ka jingtrei shitom bad ka jinglah ka jong ki, ban pynlong ïa ki lympung hapoh ki district ki jong ki.
Kane ka dei kawei na ki jingïaleh jong ka MFA bad ka Sorkar Jylla (kaba la bei pisa na ka bynta ka lympung MSL) ban pynkhlaiñ ïa ki jingdonkam na ka bynta ka jingïalehkai phutbol ha baroh ki district bad ruh ban plie ruh ka lynti ban nanglah ban poi sha ka thong jong ka jingjop.
Kane ka jingïarap ïa ki association ha ki district ka la ïarap shisha ha ka jingkiew jong ki kynhun ïalehkai, kata kito kiba la wan shakhmat lyngba ka jingïashim bynta bad ki association, kata na ki 19 tylli ki club ha kaba sdang ïa ka lympung Meghalaya State League ha u snem 2017-2018, bad mynta u snem sha ka 25 tylli ki club.
Ki Club kiba la ïoh rung sha ka lympung Meghalaya State League, ki la ïoh pdiang ruh ka jingïarap kaba long mar T.1 lak, ha kaba kito kiba rung sha ka semi-final, ki la ïoh pdiang sa mar T.1 lak. Ka Khliehmawlieh kaba la shah rem noh ha ka final, ka la ïoh pdiang sa T.3 lak katba ka Rangdajied United kaba la long ka lahduh, ka la ïoh pdiang sa T.5 lak. Nalor kane, haduh kumba 80 persen ka jingïarap pisa ba la ïoh pdiang na ka bynta ka lympung MSL, la pynphai biang sha ki club bapher bapher.
