Washington, Jylliew:
U Lamphang jong ka White House, u John Kirby, ha ka Sngi Nyngkong u la ong ba ka United States ka pynpaw ia ka jingsngew khia sha ka Sorkar Cuba halor ka jingpyniaid jong ka Cuba ia ki kam syntiat jong ka China hapoh u pud- u sam jongka.
U Kirby u la ong ruh ba ka jingiadei hapdeng ka US bad ka China ka la sdang ban troiñ ha kine ki sngi, hynrei u President ka United States- u Joe Biden, u la ialeh katba lah ban plie lad ia ki jingiakren khnang ban wanrah ia ka jing iabeit bad jing ia sngewthuh jingmut hapdeng jong baroh arliang ri.
U la ong ruh ba ka US kam shym khmih lynti eiei ban ïohsngew kum katei ka khubor halor ka jingdon jong ka tiar syntiar jong ka China hapoh Cuba bad kaba lah ruh ban ktah ia ka jingthmu leit jurip jong u Secretary of State- u Antony Blinken sha China ha kane ka taiew.
Hynrei u la ong ba wat hapdeng kitei ki jingeh kiba pyntlor ia ka jingiadei hapdeng ka China bad US kumba la iohi ha kane ka por, u President ka US u ialeh shitom ban wanrah ia ka jing iajan bad ka China da kaba plie lad- plie lynti ia ki lad jingiasuk ban ia pynbeit ha kiba bun ki liang.
Ka Wall Street Journal ha ka taiew ba la leit, ka la pynbna ba ka China ka don ia ki tiar syntiat na Cuba hynrei ha ka Sngi Nyngkong, ka China ka la kyntait bad ong ba kam shym la buh jaka syntiat eiei na Cuba kumba la shah pharep ha kane ka por.
