England, Jylliew:
Katkum ka khubor ba lah ioh lum ka iathuh ba ki lai tylli ki madan ialehkai Kriket ba pawbha ha ri Bilat, kita ka Lord’s, Oval bad ka Headingley ki long napdeng kiwei pat ki san tylli ki madan ialehkai ha katei ka ri kiba lah shah jied mynta ha kaba ka kynhun ialehkai Kriket na India kan shimbynta ha ki jingialehkai Test ha ka por ba ka kynhun kan leit ialehkai sha katei ka ri ha u snem 2025.
Kumta ruh na ka liang jong ka ECB ka pynbna ia ka prokram ialehkai jong ka ha iing na ka bynta ka shalyntem ba hynniew snem ka ban tyllun hapdeng jong u snem 2025-2031 da kaba kynthuplang ruh ia ki kynhun ialehkai jong ki shynrang bad kynthei ruh kumjuh.
Katkum ka tyllong khubor ba lah ioh lum ka iathuh ba ka India naduh mynta ka lah pynkheh ban leit sha katei ka ri ha utei u snem na ka bynta ki san tylli ki jingialehkai Test ha u bnai Jylliew 2025 bad na ka liang jong ka ECB ka iathuh ba kita ki jingialehkai baroh yn pynialehkai ha Lord’s, Oval, Edgbaston (Birmingham), Headingley (Leeds) bad ha Old Trafford (Manchester) na ka bynta ka Pataudi Trophy.
Ka madan ialehkai Rose Bowl ha Southampton, ha kaba ka India ka mad ia ka jngshah rem ba nyngkong ha ka WTC ha ka jingiakhun phainal bad ka New Zealand ha ki ar snem mynshuwa, lah pynmih bujli ia katei ka madan da ka Headingley kum ka madan ialehkai ba hakhmat eh na ka bynta ki prokram ialehkai ha u snem 2029; katba kiwei pat ki saw tylli ki madan ialehkai kata ka Lord’s, Oval, Edgbaston bad Old Trafford ki iaisah kumjuh.
ka kynhun ialehkai na India ka long tang ma ka hi marwei ka kynhun ialehkai nalor ka Australia ka ban iakhun pyrshah bad ka England ha ki san tylli ki jingialehkai Test; kata ha kaba ka England kan ialehkai ia ki jingialehkai ha-iing bad Shabar ruh kumjuh.
Ka khubor ka iathuh ruh ba ka jingwan biang jong ka England ban iakhun bad ka India kan long ha u K’lyngkot 2024 na ka bynta ki san tylli ki jingialehkai Test ha kaba ki ar kynhun ialehkai kin ia aireng na ka bynta ka Anthony de Mello Trophy. Ka kynhun ialehkai na India bad ka England ki lah dep ban iakhun ha ki san tylli ki jingialehkai Test hapdeng jong ki naduh u snem 2014, ha ryngkat bad ka jingpdiang ruh ia ka jingwan ban iakhun ka England sha India ha u 2020-21 ha kaba kawei ka jingialehkai Test lah pynduna na ka bynta ban ai jaka ia ka lympung ialehkai ba khyndiat over; ia kaba lah hap ban pynsangeh na ka jingwan lynshop kaba nyngkong jong ka khlam COVID-19.
